‘व्हॅलेंटाइन डे’मुळे गुलाब बहरला

मार्केट यार्ड -  ‘व्हॅलेंटाइन डे’च्या पार्श्‍वभूमीवर मार्केट यार्डातील फूल बाजारात विविध प्रकारच्या गुलाबांना मोठी मागणी वाढली आहे. त्यामुळे गेल्या आठवड्याच्या तुलनेत ४० टक्‍क्‍यांनी भावात वाढ झाली आहे. 

ताज्या बातम्यांसाठी डाऊनलोड करा ई-सकाळचे ऍप

रविवारी घाऊक फूल बाजारात दर्जानुसार गुलाबाच्या २० नगास १६० ते १८० रुपये भाव मिळत असल्याची माहिती अखिल फूलबाजार अडते असोसिएशनचे अध्यक्ष अरुण वीर यांनी दिली. किरकोळ बाजारात एक फूल २० रुपयांना मिळत आहे. पुढील दोन दिवसांत अजून भाव वाढतील, असे त्यांनी सांगितले.

मावळ आणि शिरूर तालुक्‍यातून बाजारात गुलाबांची आवक होत आहे. तसेच नागपूर, सुरत, बडोदा, इंदूर, हैदराबाद, दिल्ली येथे फुलांना मोठ्या प्रमाणात मागणी आहे. ‘व्हॅलेंटाइन डे’ ला आणखी चार दिवस आहेत. यामुळे अनेक शेतकऱ्यांनी माल राखून ठेवला आहे. पुढील दोन दिवसांत आणखी आवक वाढेल, असे वीर यांनी सांगितले. सध्या सोशल मीडियाचा जमाना आहे. त्यामुळे इमेज तसेच व्हिडिओद्वारे प्रेम व्यक्त करण्याचा ट्रेण्ड वाढत आहे. सध्या बाजारात मागणी कमी असल्यामुळे शेतकरी गुलाबाची लागवड कमी करत आहेत. नेहमीच्या तुलनेत ७० टक्केच लागवड केली जात असल्याचे प्रसिद्धी प्रमुख सागर भोसले यांनी सांगितले.

बाजारात पांढऱ्या, पिवळ्या इतर रंगांच्या फुलांनाही मागणी आहे. त्यांना लाल गुलाबापेक्षा जास्त भाव मिळत आहे. २० नगांना २०० रुपये भाव मिळाले.
- अरुण वीर, अध्यक्ष, अखिल फूलबाजार अडते असोसिएशन.