"रेमडेसिव्हिर'साठी पुण्याकडे कूच; बाहेरगावाहून मागणी वाढली

पुणे - रेमडेसिव्हिर इंजेक्‍शन विकत घेण्यासाठी राज्याच्या वेगवेगळ्या शहरांमधून पंचवीस गाड्या बुधवारी रात्री पुण्यात दाखल झाल्या. या इंजेक्‍शन विकत घेण्यासाठी दिवस-रात्र न बघता कोरोना रुग्णाचे नातेवाइक पुण्यातील वेगवेगळ्या औषध वितरकांच्या दुकानांवर धडका मारत आहेत. 

कोरोनाबाधित रुग्णांवर उपचारांसाठी रेमडेसिव्हिर इंजेक्‍शन डॉक्‍टर लिहून देतात. पुण्यासह राज्याच्या बहुतांश शहरांमध्ये याचा तुटवडा आहे. त्यामुळे हे इंजेक्‍शन विकत घेण्यासाठी पुण्याच्या आजूबाजूच्या गावांमधून नातेवाइक आतापर्यंत येत होतेच; पण आता जळगाव, औरंगाबाद, नाशिक, लातूर, उस्मानाबाद, कोल्हापूर, सांगली, वाई, संगमनेर, मिरज येथूनही नातेवाइक गाड्या घेऊन पुण्यात दाखल होत आहेत. पुण्यातील एका वितरकाच्या दुकानामध्ये बुधवारी रात्री बाहेर गावाहून हे इंजेक्‍शन घेण्यासाठी आलेल्या नातेवाइकांची गर्दी होती. रेमडेसिव्हिरचा 15 सप्टेंबरपर्यंत पुरवठा व्यवस्थित होता. मागणीप्रमाणे प्रत्येक रुग्णाला इंजेक्‍शनचा पुरवठा होत असे. अचानक या इंजेक्‍शनची मागणी वाढल्याने कंपनीकडून होणारा पुरवठा कमी पडत आहे. 

पुण्याच्या बातम्या वाचण्यासाठी येथे ► क्लिक करा

या इंजेक्‍शनसाठी इतकी धावपळ आतापर्यंत कधीच झाली नव्हती. गेल्या दहा-बारा दिवसांपासून याची मागणी चार पटीने वाढली आहे. राज्याच्या वेगवेगळ्या जिल्ह्यांमधून रुग्णांचे नातेवाइक हे इंजेक्‍शन घेण्यासाठी पुण्यात येत आहेत. डॉक्‍टर रेड्डी, ज्युबिआर, हेट्रो, सिप्ला या कंपन्या इंजेक्‍शनचे उत्पादन करतात; पण त्यापैकी फक्त हेट्रो कंपनीकडून इंजेक्‍शनचा सर्वाधिक पुरवठा होत आहे. 

ताज्या बातम्यांसाठी डाऊनलोड करा ई-सकाळचे ऍप

ग्रामीण भागातून मागणी वाढली 
आतापर्यंत पुण्या-मुंबईतील डॉक्‍टर हे इंजेक्‍शन लिहून देत होते; पण आता ग्रामीण भागातील डॉक्‍टरही रुग्णांच्या उपचारांसाठी हेच इंजेक्‍शन आणण्याचा सल्ला रुग्णाच्या नातेवाइकांना देत आहेत. त्यामुळे नातेवाइकांची तारांबळ उडत आहे. इतके दिवस टॉसिलिझुमॅब या महागड्या इंजेक्‍शनसाठी नातेवाइक वणवण फिरत होते. आता रेमडेसिव्हिरसाठी पळापळ सुरू आहे, असे निरीक्षण वितरकांनी नोंदविले. 

पिंपरी-चिंचवडच्या बातम्या वाचण्यासाठी येथे ► क्लिक करा