संशोधक विद्यार्थ्याला मासिक शिष्यवृत्ती

छत्रपती संभाजीनगर, ता. १७ : डॉ.बाबासाहेब आंबेडकर मराठवाडा विद्यापीठातील संगणकशास्त्र विभागातील गुणवंत विद्यार्थ्यांस संशोधनासाठी दहा हजार रुपये मासिक शिष्यवृत्ती देण्यात येणार आहे. यासंदर्भात मुंबई येथील उमेद फाउंडेशन यांच्यासोबत सामंजस्य करार करण्यात आला.
व्यवस्थापन परिषद कक्षात आज बैठक होऊन सामंजस्य करारावर स्वाक्षरी करण्यात आली. यावेळी कुलसचिव डॉ. प्रशांत अमृतकर, विज्ञान व तंत्रज्ञान विद्याशाखेचे अधिष्ठाता डॉ. महेंद्र शिरसाठ आदी उपस्थित होते. या करारानुसार माजी विभागप्रमुख डॉ. सुरेशचंद्र मेहरोत्रा यांच्या अमृतमहोत्सवानिमित्त विभागातील एका गुणवंतास संशोधनासाठी प्रतिमहिना दहा हजार रुपये शिष्यवृत्ती देण्यात येणार आहे. दोन वर्षे ही शिष्यवृत्ती देण्यात येणार आहे.