वरसूबाई देवस्थान ट्रस्टला आई, पत्नीच्या स्मरणार्थ मदत

फुलवडे, ता. १७ ः फुलवडे (ता. आंबेगाव) येथील सेवानिवृत्त मुख्याध्यापक किसन नंदकर यांनी त्यांची आई दिवंगत तुळसाबाई नंदकर व पत्नी दिवंगत पार्वती नंदकर यांच्या स्मरणार्थ सुकाळवेढे (ता. जुन्नर) येथील श्री वरसूबाई मंदिर देवस्थान ट्रस्टला ५१ हजार १५१ रुपयांची देणगी दिल्याची माहिती श्री. वरसूबाई मंदिर देवस्थान ट्रस्टचे अध्यक्ष दत्तात्रेय गवारी यांनी दिली.
यावेळी देवस्थान ट्रस्टचे उपाध्यक्ष बुधाजी ढेंगळे, सहसचिव बाजीराव ढेंगळे, विश्वस्त दत्ता ढेंगळे, मोतीराम ढेंगळे, जानकू ढेंगळे उपस्थित होते. जुन्नर तालुक्यात सुकाळवेढे येथे वसलेले श्री वरसूबाई मंदिर हे एक निसर्गरम्य आणि आदिवासी संस्कृतीची ओळख करून देणारे प्राचीन जागृत देवस्थान आहे. साधारणपणे ऑक्टोबर महिन्यात याठिकाणी मोठी यात्रा भरते. विशेषतः दसरा किंवा नवरात्रीच्या काळात येथे भाविकांची मोठी गर्दी असते. डोंगराळ व दुर्गम भागात स्थित आहे. मंदिराच्या दक्षिणेस डिंभे धरण जलाशय आहे.