Pune News : होर्डिंगच्या स्ट्रक्टरल ऑडिटीची उलट तपासणी

पुणे - अधिकृत होर्डिंग सुरक्षीत असल्याचा स्ट्रक्चरल ऑडिट अहवाल होर्डिंग व्यावसायिकांनी महापालिकेला सादर केला आहे. पण ते खरेच सुरक्षीत आहेत की नाही याची उलट तपासणी आता महापालिका करणार आहे. त्यासाठी महापालिकेच्या पॅनेलवरील पाच स्ट्रक्चरल इंजिनिअरकडून हे काम करून घेतले जाणार आहे.

पिंपरी चिंचवड महापालिकेच्या हद्दीत अवकाळी पावसात अनधिकृत होर्डिंग कोसळून पाच जणांचा बळी गेला. त्यापार्श्‍वभूमीवर अतिरिक्त आयुक्त डॉ. कुणाल खेमनार यांनी पुणे शहरात होर्डिंग पडून जिवीतहानी, वित्तहानी होऊ नये, वाहतुकीचा खोळंबा होऊ नये यासाठी व्यावसायिकांनी स्ट्रक्चरल ऑडिट करून त्याचा अहवाल सादर करण्याचे आदेश दिले होते.

जे व्यावसायिक अहवाल सादर करणार नाहीत, त्यांचे होर्डिंग अनधिकृत समजून त्यांना नोटीस देऊन होर्डिंग काढून टाकण्याची कार्यवाही सुरू करावी असेही आदेशात नमूद केले होते. हे आदेश काढून दोन महिने झाले तरी क्षेत्रीय कार्यालयाचे सहाय्यक आयुक्त, परिमंडळ उपायुक्तांकडून स्ट्रक्चरल ऑडिचे अहवाल व कारवाई केल्याचा अहवाल सादर न केल्याने त्यांच्यावर कारवाईचा बडगा उचलला आहे. दरम्यान, धोकादायक होर्डिंग संदर्भात ‘सकाळ’ वृत्त देऊन याचा पाठपुरावा केला होता.

दरम्यान आता आकाश चिन्ह विभागाकडे सुमारे १६०० होर्डिंगच्या स्ट्रक्चरल ऑडिटची माहिती सादर झाली आहे. आता हे ऑडिट रिपोर्ट खरे आहे की खोटे याची उलट तपासणी महापालिका करणार आहे. त्यासाठी महापालिकेच्या पॅनेलवरील पाच स्ट्रक्चरल इंजिनिअरकडे हे काम दिले जाणार आहे, असे आकाशचिन्ह विभागाचे उपायुक्त माधव जगताप यांनी सांगितले.