आळे येथील विद्यार्थ्यांना वाहतूक सुरक्षेचे मार्गदर्शन

आळेफाटा, ता. १८ ः आळे (ता. जुन्नर) येथील ज्ञानमंदिर हायस्कूल व कनिष्ठ महाविद्यालय आणि बाळासाहेब जाधव महाविद्यालयातील विद्यार्थ्यांना रस्ता सुरक्षेबाबत मार्गदर्शन करण्यात आले. रस्ता सुरक्षा मोहिमेंतर्गत पोलिस निरीक्षक विश्वास जाधव यांच्या मार्गदर्शनाखाली पोलिस हवालदार ज्योती दहिफळे यांनी मार्गदर्शन केले. या प्रसंगी प्रल्हाद आव्हाड, प्रतिक जोरी, मंगेश कदम, पोपट कोकटे, प्राचार्य डॉ. प्रविण जाधव आदी उपस्थित होते.
हवालदार दहिफळे या विद्यार्थ्यांना संबोधित करताना म्हणाल्या की, ‘‘आज रस्ते अपघात मोठ्या प्रमाणावर होत आहेत, ज्याचे मुख्य कारण म्हणजे रस्ता सुरक्षेकडे लक्ष न देणे. चालकाचा बेजबाबदारपणा, मद्यधुंद अवस्थेत, फोनवर बोलत वाहन चालवणे आणि वाहतुकीच्या नियमांकडे दुर्लक्ष करणे ही यामागची कारणे आहेत. हे अपघात टाळण्यासाठी प्रत्येकाला रस्ते सुरक्षेची मूलभूत माहिती असणे आवश्यक आहे. वाहन चालवताना सीट बेल्ट व हेल्मेटचा वापर करावा. वाहनाचा वेग नियंत्रणात ठेवावा. प्रवासात मद्यपान किंवा धूम्रपान टाळावे. या उपायांचा अवलंब केल्यास रस्ते अपघात बऱ्या‍च प्रमाणात टाळता येऊ शकतात.’’