पुणे : छत्रपती शिवाजी महाराजांपेक्षा कोणीही मोठा नाही. शिवाजी महाराज राष्ट्रपुरुष हे असल्यामुळे त्यांचा दिल्लीच्या संसदेतसुद्धा जयघोष झाला पाहिजे. मात्र, जय भवानी, जय शिवराय...अशा घोषणा दिल्यानंतर ज्या शिवद्रोह्यांच्या पोटात आग लागली, त्यांना समाज कधीही माफ करणार नाही. छत्रपती शिवाजी महाराजांची शपथ घेतली म्हणून छत्रपतींचा आणि त्यांच्या वंशजांचा अपमान केल्याप्रकरणी उपराष्ट्रपती व्यंकय्या नायडू व इतर नेत्यांनी महाराष्ट्रासह देशाची माफी मागितली पाहिजे, अशी भूमिका संभाजी ब्रिगेडने मांडली.
राज्यसभेच्या सदस्यत्वाची शपथ घेताना छत्रपती उदयनराजे भोसले यांनी जय भवानी, जय शिवराय...अशा घोषणा दिल्या. त्यावेळी उपराष्ट्रपती व्यंकय्या नायडू यांनी त्यांना रोखले. या प्रकाराबाबत संभाजी ब्रिगेडने आक्रमक भूमिका घेतली असून, याबाबत संभाजी ब्रिगेड पुणे जिल्ह्याच्या वतीने १ लाख पत्र उपराष्ट्रपती व्यंकय्या नायडू यांना पाठवणार आहे. त्याची सुरवात करताना संभाजी ब्रिगेडने आपली भूमिका मांडली. या वेळी संभाजी ब्रिगेडचे नेते विकास पासलकर, जिल्हाध्यक्ष संतोष शिंदे, शहराध्यक्ष प्रशांत धुमाळ, सचिव महादेव मातेरे, भोर तालुकाध्यक्ष गणेश चऱ्हाटे, विराज तावरे, विकास मोरे आदी उपस्थित होते.
संसदेचे सभागृह जागेवर उभा आहे, ती जागा सुभेदार मल्हारराव होळकर यांनी दान केलेली जमीन आहे. छत्रपती शिवाजी महाराजांच्या आणि मराठा साम्राज्याच्या कर्तृत्वाचा वसा आणि वारसा जगाला प्रेरणा देणारा आहे. त्यामुळे दान केलेल्या जमिनीच्या सभागृहात छत्रपतींचा अपमान, हा शिवद्रोह आहे. म्हणून या विरोधात संभाजी ब्रिगेड पुणे जिल्ह्याच्या वतीने १ लाख पत्र उपराष्ट्रपती व्यंकय्या नायडू यांना पाठवणार आहे. छत्रपतींचा आशीर्वाद, चला देऊ मोदींना साथ, अशी घोषणा देऊन भाजपने शिवाजी महाराजांच्या नावाचा वापर करून महाराष्ट्रात मतांची भीक मागितली. त्याच मतांच्या जोरावर नरेंद्र मोदी हे पंतप्रधान झाले. छत्रपती किंवा छत्रपतींच्या वंशाचा अपमान संभाजी ब्रिगेड खपवून घेणार नाही.
जय जिजाऊ...जय शिवराय..., जय भवानी...जय शिवराय..., छत्रपती शिवाजी महाराज की...जय.., या घोषणा नसून एक प्रेरणादायी जय जयकार आहे. हे काँग्रेस, भाजप आणि इतर पक्षांनी लक्षात घ्यावे.
- संभाजी ब्रिगेड, पुणे
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.