सांगोल्यात १३ हजारांचा
पान मसाल्याचा साठा जप्त
‘अन्न व औषध’ची कारवाई; दोघांवर गुन्हा
सकाळ वृत्तसेवा
सांगोला, ता. २२ : सांगोला- पंढरपूर रोडवरील रक्षा नाश्ता सेंटरमध्ये महाराष्ट्र शासनाने प्रतिबंधित केलेल्या पान मसाला व तंबाखूजन्य पदार्थांचा साठा आढळून आल्याने अन्न व औषध प्रशासनाच्या अधिकाऱ्यांनी कारवाई केली. या कारवाईत विविध कंपन्यांची १३३ पाकिटे जप्त करण्यात आली असून, त्यांची एकूण किंमत १३ हजार ७१० रुपये आहे. या प्रकरणी भारती संतोष ठोकळे (वय ४०, रा. मराठी शाळेजवळ, भीमनगर, सांगोला) तसेच पंढरपूर येथील एका अज्ञात पुरवठादाराविरुद्ध सांगोला पोलिस ठाण्यात गुन्हा दाखल करण्यात आला आहे.
अन्न सुरक्षा अधिकारी गणेश महादेव कदम यांच्या फिर्यादीनुसार, २१ ऑगस्ट रोजी पोलिसांना मिळालेल्या गुप्त माहितीच्या आधारे अन्न व औषध प्रशासनाच्या अधिकाऱ्यांनी पोलिस पथकासह रक्षा नाश्ता सेंटरची तपासणी केली. यावेळी विक्रीच्या उद्देशाने प्रतिबंधित अन्नपदार्थांचा साठा करून ठेवल्याचे आढळून आले.
चौकशीत हा माल पंढरपूर येथील एका अज्ञात व्यक्तीकडून दुचाकीवरून आणून पुढील विक्रीसाठी पुरवठा केला जात असल्याचे समोर आले. संबंधित व्यक्तीचा भ्रमणध्वनी क्रमांकही देण्यात आल्याचे फिर्यादीत नमूद आहे. जप्त केलेला माल पुढील कार्यवाहीसाठी अन्न व औषध प्रशासनाच्या ताब्यात देण्यात आला आहे.
प्रतिबंधित पदार्थांची पुनर्विक्री होऊ नये म्हणून संबंधित गाळे पुढील आदेशापर्यंत सीलबंद करण्यात आले आहेत. या प्रकरणी अन्न सुरक्षा व मानदे कायद्यासह भारतीय न्याय संहितेतील विविध कलमांनुसार कारवाई करण्यात आली आहे. प्रतिबंधित पदार्थांचा मूळ पुरवठादार, मालक आणि संबंधित गाळ्यांच्या मालकीबाबत पोलिसांकडून पुढील तपास सुरू आहे.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.
