माझा प्रभाग, माझे व्हिजन : सांगोला

SGW26B09371

मूलभूत सुविधा लवकरच देण्यास प्राधान्य

सांगोला : माझा प्रभाग क्रमांक एक हा विविध वस्त्यांनी समृद्ध आणि वेगाने विकसित होणारा भाग आहे. या प्रभागात वाड्या-वस्त्यांचा मोठ्या प्रमाणात समावेश असल्यामुळे मूलभूत सुविधांची गरज अधिक आहे. नागरिकांच्या अपेक्षा आणि गरजा लक्षात घेऊन सर्वांगीण विकास साधण्याचा निर्धार आहे. सर्वप्रथम, प्रभागातील प्रत्येक घरापर्यंत नियमित आणि योग्य दाबाने पाणीपुरवठा पोचवणे ही माझी प्राथमिकता आहे. काही भागात पाण्याचा कमी दाब आणि अनियमित पुरवठा ही समस्या आहे. विशेषतः चिंचोली रोड व एखतपूर रोड परिसरातील नागरिकांसाठी प्रत्येकी पाच लाख लिटर क्षमतेच्या नव्याने दोन पाण्याच्या टाक्यांसाठी मी पाठपुरावा करणार आहे. काही वस्त्यांमध्ये रस्त्यांबाबत अडचणी आहेत. शेतकरी व नागरिकांचा समन्वय साधून त्या अडचणी दूर करून दर्जेदार आणि टिकाऊ रस्ते करणार आहे. वीज व्यवस्था सक्षम करणे, नियमित पाणीपुरवठा, भक्कम रस्ते आणि सुसज्ज पायाभूत सुविधा यासाठी मी सातत्याने प्रयत्नशील राहणार आहे.
- रामचंद्र मदने, नगरसेवक, सांगोला.