ओतूरच्या संजय देशमुख यांची एमडीआरटी सन्मानासाठी निवड

ओतूर, ता. ३ ः ओतूर (ता. जुन्नर) येथील आयुर्विमा सल्लागार संजय देशमुख यांची एमडीआरटी या विमा क्षेत्रातील सर्वोच्च सन्मानासाठी सलग सात वेळा निवड झाली आहे. भारतीय आयुर्विमा महामंडळाकडून (एलआयसी) पुणे विभागातील २०२७ वर्षाचा हा पुरस्कार त्यांना जाहीर झाला. हा पुरस्कार मिळविणारे देशमुख हे एलआयसीच्या पुणे विभागातील पहिले विमा प्रतिनिधी आहेत. या पुरस्कारासाठी विमा सल्लागाराला १ जानेवारी ते ३१ डिसेंबर या वेळेत उच्च प्रीमियम विक्रीचे उद्दिष्ट पूर्ण करावे लागते. देशमुख यांनी हे उद्दिष्ट २५ फेब्रुवारी पर्यंतच (५६ दिवसातच) पूर्ण केले. यामुळे अमेरिकेत २०२७ मध्ये होणाऱ्या जागतिक विमा परिषदेला त्यांना उपस्थित राहता येणार आहे. या सन्मानाबद्दल मार्गदर्शक डी. डी. डोके, किशोर साळवे, योगीराज गेडाम यांनी देशमुख यांचे अभिनंदन केले.