Pune Municipal Corporation : विद्यार्थ्यांच्या शिष्यवृत्तीचे बँक खात्यात ११ कोटी ७१ लाख जमा

पुणे - पुणे महापालिकेतर्फे इयत्ता १० वी, १२ वीच्या विद्यार्थ्यांना देण्यात येणाऱ्या शिष्यवृत्तीचे ११ कोटी ७१ लाख ७५ हजार रुपये जमा करण्यात आले आहेत. आत्तापर्यंत ६ हजार ८९७ विद्यार्थ्यांच्या बँक खात्यात पैसे जमा झाले आहेत. समाज विकास विभागाचे उपायुक्त नितीन उदास यांनी ही माहिती दिली.

पुणे महापालिकेतर्फे इयत्ता १० वीत ८० टक्केपेक्षा जास्त गुण घेणाऱ्या विद्यार्थ्यांना भारतरत्न मौलाना अबुल कलाम आझाद शैक्षणिक अर्थसाहाय्य योजनेंतर्गत १५ हजार तर इयत्ता १२वीत ८० टक्कपेक्षा जास्त गुण घेणाऱ्या विद्यार्थ्यांना लोकशाहीर अण्णाभाऊ साठे शैक्षणिक अर्थसाहाय्य योजनेतून २५ हजार रुपयांची शिष्यवृत्ती दिली जाते. पुणे शहराच्या हद्दीत राहणाऱ्या राहाणाऱ्या सर्व विद्यार्थ्यांसाठी ही योजना असल्याने याचा लाभ अनेकांना मिळतो.

गेल्यावर्षी १०वी व १वी ८० टक्केपेक्षा जास्त गुण घेऊन उत्तीर्ण झालेल्या विद्यार्थ्यांचे ३१ सप्टेंबरपर्यंत अर्ज मागविण्यात आले होते. या कालावधीत आतापर्यंत दोन्ही योजनांसाठी १३ हजार ८५४ अर्ज महापालिकेकडे प्राप्त झाले. यात अबुल कलाम आझाद योजनेसाठी १० हजार ३०५, तर अण्णाभाऊ साठे योजनेसाठी ३ हजार ५४९ अर्ज आले आहेत.

एकूण १३ हजार ८५४ अर्जापैकी ६ हजार ८९७ लाभार्थ्यांच्या बँक खात्यामध्ये ११ कोटी ७१ लाख ७५ हजार रुपये खात्यामध्ये जमा झाले आहेत. उर्वरित विद्यार्थ्यांचेही पैसे लवकरच जमा केले जातील, असे उपायुक्त नितीन उदास यांनी सांगितले.