संशोधनासाठी जगभरातील शास्त्रज्ञांनी एकत्र यावे - डॉ. जयंत नारळीकर

पुणे - ""विश्‍वाचा विस्तार पाहता, आता वैयक्तिकरीत्या संशोधन करणे फार जिकिरीचे झाले आहे. संशोधनासाठी लागणारा वेळ, खर्च, संदर्भाची मांडणी हे पाहता संशोधनासाठी जगभरातील शास्त्रज्ञांनी एकत्र येणे गरजेचे आहे. त्यामुळे संशोधनासाठी लागणारा वेळ, संसाधने आणि पैसा यांची बचत होऊन पर्यायाने संशोधनाचा वेग आणि उपयुक्तता वाढणार आहे,'' असे मत ज्येष्ठ खगोलशास्त्रज्ञ डॉ. जयंत नारळीकर यांनी व्यक्त केले. 

आंतरविद्यापीठीय खगोलशास्र आणि खगोलभौतिकी केंद्रात (आयुका) राष्ट्रीय विज्ञान दिनानिमित्त आयोजित "शास्त्रज्ञांशी संवाद' कार्यक्रमात विद्यार्थ्यांनी विचारलेल्या प्रश्‍नाला उत्तर देताना डॉ. नारळीकर बोलत होते. या वेळी आयुकाचे संचालक डॉ. सोमक रॉयचौधरी उपस्थित होते. 

पृथ्वीचे भविष्य, कृष्णविवराचे रहस्य, लायगो प्रकल्प, मंगळावरील जीवसृष्टी, आकाशाचा रंग अशा विविध विषयांवर विद्यार्थ्यांनी डॉ. नारळीकर आणि डॉ. चौधरी यांना कल्पक प्रश्‍न विचारले."ज्योतिषशास्राकडे विज्ञान म्हणून बघावे का?' या प्रश्‍नाचे उत्तर देताना डॉ. नारळीकर म्हणाले, ""विज्ञानाच्या प्रत्येक विधानाला पुरावा लागतो, परंतु ज्योतिषशास्त्राच्या विधानाला कोणताही पुरावा मिळत नाही. त्यामुळे ज्योतिषशास्त्राला आधुनिक विज्ञानाच्या दृष्टीने बघता येणार नाही.'' 

""जगभरातील शास्त्रज्ञ संशोधनासाठी एकत्र येत असताना भारत म्हणून आपण कोणती जबाबदारी पार पाडतो हे पाहणे महत्त्वाचे ठरते. सध्या जगभरातील विविध संशोधन संस्थांमध्ये भारतीय संशोधक नेतृत्व करत आहे. संशोधनातील कार्यक्षमता पाहता भविष्यातील संशोधनात भारत नक्कीच जगाचे नेतृत्व करेल, असा विश्‍वास डॉ. रॉयचौधरी यांनी व्यक्त केला. गुरुत्वीय लहरींचा शोध लावणाऱ्या "लायगो' या प्रयोगशाळेचा सामान्य माणसाला होणाऱ्या फायद्याबद्दल डॉ. रॉयचौधरी यांनी या वेळी अधिक माहिती दिली. आयुकामध्ये या वेळी विविध खगोलप्रदर्शनाचे आयोजन केले होते. विद्यार्थ्यांबरोबरच पालकांचा त्याला उत्स्फूर्त प्रतिसाद मिळाला. 

सकाळ'ला सोशल मीडियावर लाईक करा :
'सकाळ' फेसबुक : @SakalNews
'सकाळ' ट्विटर : @eSakalUpdate
इन्स्टाग्राम : @esakalphoto