परराष्ट्र मंत्री जयशंकर - अमेरिकेचे सिनेटर स्टीव्ह डेन्स यांची भेट

डेन्स यांनी घेतली जयशंकर यांची भेट

व्यापार करार मार्गी लागण्याच्या दिशेने सकारात्मक पाऊल

सकाळ न्यूज नेटवर्क
नवी दिल्ली, ता. १८ ः- भारत दौऱ्यावर आलेले अमेरिकेचे सिनेटर स्टीव्ह डेन्स यांची परराष्ट्र मंत्री एस. जयशंकर यांनी आज भेट घेतली, या भेटीदरम्यान भारत अमेरिकेच्या द्विपक्षीय संबंधांवर चर्चा झाल्याचे परराष्ट्र मंत्र्यांनी म्हटले आहे. सर्जियो गोर यांनी भारतातील अमेरिकेचे राजदूत म्हणून पदभार स्वीकारल्यानंतर भारताशी व्यापार करारावर सकारात्मक भाष्य केले होते. त्यापार्श्वभूमीवर डेन्स यांच्या या दौऱ्याकडे भारत-अमेरिका व्यापार करार मार्गी लावण्याच्या दिशेने पुढचे पाऊल म्हणूनही पाहिले जात आहे.
सिनेटर डेन्स यांच्याशी झालेल्या भेटीनंतर परराष्ट्र मंत्री एस. जयशंकर यांनी समाज माध्यमांतून या भेटीबाबत माहिती दिली. जयशंकर म्हणाले, ‘‘सिनेटर स्टीव्ह डेन्स यांना भेटून आनंद झाला. द्विपक्षीय संबंध आणि त्याचे धोरणात्मक महत्त्व यावर त्यांच्याशी व्यापक चर्चा झाली.’’ तत्पूर्वी परराष्ट्रमंत्री जयशंकर यांची अमेरिकेचे परराष्ट्रमंत्री मार्को रूबियो यांच्याशीही फोनवरून बातचीत झाली होती. त्यात व्यापार करार महत्त्वाची खनिजे, संरक्षण, नागरी अणु सहकार्य आणि ऊर्जा यासह विविध द्विपक्षीय संबंधांवर बातचीत झाली होती.
अमेरिकेचे अध्यक्ष ट्रम्प यांनी रशियाकडून तेलखरेदीचे निमित्त करून भारतावर लादलेले आयात शुल्क आणि त्यानंतर इराणकडून तेल खरेदीवरून ब्रिक्स देशांवर पर्यायाने भारतावर वाढीव आयात शुल्क आकारण्याची दिलेली धमकी यामुळे भारत व अमेरिकेचे संबंध ताणले गेले आहेत. अशात भारताशी व्यापार करारासाठी अमेरिकेकडून सकारात्मक हालचाली सुरू झाल्याच्या पार्श्वभूमीवर अमेरिकेतील भारतीय राजदूत क्वात्रा यांनी सिनेटर डेन्स यांची नुकतीच भेट घेतली होती. त्यानंतर डेन्स यांचा भारत दौरा हा व्यापार कराराच्या दिशेने महत्त्वाची घडामोड असल्याचे मानले जात आहे.