सेव्हन लव्हज चौक बनला मद्यपिंचा अड्डा

कॅन्टोन्मेंट - सेव्हल लव्हज चौक मद्यपिंचा अड्डा बनला असून, उड्डाण पुलाखाली दारूच्या बाटल्यांचा खच पडला आहे. त्यामुळे येथून ये-जा करणाऱ्या महिला-मुलींमध्ये असुरक्षितता निर्माण झाली आहे. रात्रीची गस्त वाढवून पोलिसांनी मद्यपिंवर कारवाई करावी, अशी मागणी राष्ट्रवादी पुणे शहर चिटणीस जुबेर बाबू शेख यांनी केली आहे.

यावेळी जुबेर बाबू शेख म्हणाले की, रात्र भर याठिकाणी वाइन शॉप सुरू असते. अनेक जण मद्यपान करून रस्त्यावर अर्वाच्य भाषेत शिवीगाळ, मारामारी व भांडणे करणे असा धिंगाणा रात्र भर सुरूच असतो. हे वाइन शॉप रात्र भर सुरू ठेवण्यासाठी कोणत्या नियमात शॉप धारकांना परवानगी देण्यात आली आहे. याची चौकशी झाली पाहिजे.

स्वारगेटजवळील सेव्हन लव्हज चौक परिसर वर्दळीचा आहे. रात्री-अपरात्री कामगारवर्गालाही या ठिकाणाहून घरी जाताना धोका वाढला आहे. दारूच्या नशेत हे मद्यपिं रस्त्यावरच लघुशंका करत असतात. त्यामुळे परिसरात मोठ्या प्रमाणात दुर्गंधी पसरली जात आहे. सध्या उड्डाणपुलाखाली सुशोभीकरनाचे काम सुरू आहे. त्यात दारूच्या बाटल्यांचा खच व कचऱ्याच्या घाणीच्या साम्राज्याने येथील परिस्थिती विदारक झाल्याने नागरिकांनी तीव्र संताप व्यक्त केला. यावेळी रात्रीच्या गस्तीवरील पोलिसांनी मद्यपींवर कारवाई करावी. तसेच, नागरिकांच्या सुरक्षिततेसाठी पोलिसांची रात्री गस्त वाढवावी, अशी मागणी ज्येष्ठ नागरिकांनी केली आहे.

यासंदर्भात खडक पोलीस स्टेशनचे वरिष्ठ पोलीस निरीक्षक श्रीहरी बहिरट यांनी त्याठिकाणी रात्रीची गस्त असल्याचे सांगितले.