घोरपडीमधील 'हा' भाग बनला कोरोनाचा नवा हॉटस्पॉट

घोरपडी (पुणे) : बी. टी. कवडे रस्ता येथील शक्तिनगर वस्तीमध्ये करोनाचे तीन दिवसात सतरा रुग्ण आढळले आहेत. मागील आठवड्यात एका मटण विक्रेत्याला कोरोना चाचणीचा अहवाल सकारात्मक आल्यानंतर वस्तीतील इतर नागरिकांची चाचणी घेण्यात आली. यामध्ये २५ नागरिक पैकी सतरा जण कोरोना बाधित असल्याचा रिपोर्ट आला. काल हे अहवाल आल्यानंतर वस्तीतील सर्व नागरिकांची चाचणी करण्यात येत आहे. यामध्ये आणखी रुग्णांची संख्या वाढण्याची शक्यता असून त्याबाबत काळजी घेत असल्याचे आरोग्य विभागाकडून सांगण्यात येत आहे.

- पुण्यातील दोन खासदार देशातील टॉप फाईव्ह परफॉर्मर! वाचा सविस्तर रिपोर्ट

 जवळपास पाचशे लोकवस्ती असलेल्या या झोपडपट्टीमध्ये अतिशय दाटीवाटीने घरे आहेत. तसेच अनेक नागरिकांकडे स्वतः चे शौचालय नाही. त्यामुळे इथे रुग्णाची संख्या वाढू नये यासाठी या वस्तीतील काही कुटुंबांना ढोले पाटील रोडवरील महात्मा फुले शाळेमध्ये स्थलांतरित केले आहे. तसेच वस्तीतील १५० नागरिकांचे स्वॅब घेतले असून याचे अहवाल येणे बाकी आहे. प्रादुर्भाव रोखण्यासाठी वस्तीमध्ये फवारणी आणि आरोग्य सर्वेक्षण सुरू केले आहे.अशी माहिती ढोले पाटील क्षेत्रीय कार्यालयाचे सह आयुक्त दयानंद सोनकांबळे यांनी दिली.

- अर्सेनिक अल्बम-30 वापटला स्थगिती मागत होते; कोर्टाने घेतला मोठा निर्णय

सध्या बी. टी. कवडे रस्त्यावरील शिवदत्त कॉलनी, पवार इंटरप्राईज, श्रीनाथ नगर, ढवळे वस्ती, निगडे वस्ती या परिसरात  काही रुग्ण आढळले आहेत.  लॉकडाऊन संपल्यानंतर घोरपडी परिसरात रुग्ण संख्या वाढली आहे.   परिसरात जवळपास ५० रुग्ण असून त्याबाबत मात्र नागरिकांमध्ये गांभीर्य दिसत नाही. रस्त्यावर रोज गर्दी होत असून नागरिक कोणत्याही नियमांचे पालन करत नाही असे दिसून येते. सोबत घोरपडी मधील उच्चभ्रू लोकांची सोसायटी असलेला सोपान बाग परिसरात देखील दोन रुग्ण सापडले. आतापर्यंत ग्रीन झोन म्हणून ओळख असलेला परिसर येथे रुग्ण सापडल्याने परिसरातील नागरिक घाबरले आहेत.