तळेगाव ढमढेरे - तळेगाव ढमढेरे (ता. शिरूर) या ऐतिहासिक व एकसंध गावाची जिल्हा परिषद गट व पंचायत समिती प्रभाग रचनेत दोन जिल्हा परिषद गटात विभागणी झाल्याने संतप्त ग्रामस्थांनी शुक्रवारी कडकडीत गाव बंद ठेवून प्रशासनाच्या विरुद्ध निषेध मोर्चा काढला..पूर्वीप्रमाणे तळेगाव ढमढेरे हा जिल्हा परिषद गट ठेवावा तसेच दोन जिल्हा परिषद गटात झालेली प्रभागांची विभागणी रद्द करावी या मागणीसाठी मोर्चाचे आयोजन करण्यात आले होते. हनुमान मंदिरपासून मुख्य बाजारपेठेतून ग्रामपंचायत कार्यालयापर्यंत मोर्चा काढण्यात आला.यामध्ये माझा गाव माझा अभिमान, तळेगाव ढमढेरे जिल्हा परिषद गट कायम ठेवा, प्रभागाची केलेली विभागणी रद्द करा आदी घोषणांनी बाजारपेठ दुमदुमून गेली. गावाची विभागणी केल्याच्या निषेधार्थ सर्वांनी काळी रिबीन बांधून हातात फलक घेऊन प्रशासनाचा निषेध केला. मोर्चात सर्व राजकीय पक्ष, संघटना व ग्रामस्थ मोठ्या संख्येने सहभागी झाले होते..मोर्चानंतर ग्रामपंचायत कार्यालयासमोर विशेष ग्रामसभा घेण्यात आली. ग्रामविकास अधिकारी राजेंद्र सात्रस यांनी विशेष ग्रामसभेचा उद्देश सांगितला. ग्रामसभेतील ठरावाचे वाचन ॲड.गणेश तोडकर यांनी केले. यावेळी ग्रामस्थांतर्फे झालेल्या अन्याय विरुद्ध प्रशासनाचा तीव्र शब्दात मनोगतातून निषेध करण्यात आला.तळेगाव ढमढेरे जिल्हा परिषद गट कायम ठेवावा तसेच गावाची दोन जिल्हा परिषद गटात झालेली विभागणी रद्द करावी अशा प्रकारचा ठराव यावेळी सर्वानुमते करण्यात आला. २१ जुलै पर्यंत जिल्हाधिकाऱ्यांकडे हरकती नोंदविण्याचे सर्वानुमते ठरले. यावेळी ठरावाला वकील संघटनेने पाठिंबा दिला..तसेच शिवसेना उद्धव बाळासाहेब ठाकरे पक्षाचे आमदार सचिन अहिर यांनी विधान परिषदेमध्ये लक्षवेधी मांडल्याबद्दल त्यांचे अभिनंदन करण्यात आले. तळेगाव ढमढेरे गावावर झालेला अन्याय दूर करण्यासाठी आम्ही प्रशासनाकडे विशेष प्रयत्न करणार असल्याचे विविध राजकीय पक्षांच्या पदाधिकाऱ्यांनी यावेळी सांगितले. प्रभारी सरपंच कोमल शिंदे यांनी आभार मानले.दरम्यान, शुक्रवारी तळेगाव ढमढेरे गाव दिवसभर कडकडीत बंद ठेवण्यात आले होते. जिल्हा परिषद निवडणूक प्रारूप आराखड्यात तळेगाव ढमढेरे गावाची दोन गटात विभागणी झाली आहे. यामध्ये सणसवाडी गटात प्रभाग क्रमांक एक आणि उर्वरित प्रभाग क्रमांक दोन ते सहा हे शिक्रापूर गटामध्ये समाविष्ट केले आहेत..ऐतिहासिक व मोठ्या लोकसंख्येचे गाव असूनही येथील ग्रामस्थ गुण्यागोविंदाने एकसंध राहिले आहेत. जिल्हा परिषद गटात गावाचे दोन विभाग केल्याने सर्वच ग्रामस्थांनी तीव्र संताप व्यक्त केला आहे.गावच्या अस्मितेसाठी गावातील सर्व लोक मोर्चात सहभागी होऊन ग्रामसभेला उपस्थित राहिले. सर्व ग्रामस्थ एक झाले त्याबद्दल पुणे जिल्हा दूध संघाचे अध्यक्ष ॲड. स्वप्निल ढमढेरे यांच्यातर्फे सर्वांना पेढे वाटप करण्यात आले..सकाळ+ चे सदस्य व्हा ब्रेक घ्या, डोकं चालवा, कोडे सोडवा!शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.
