समांतर हॅरिस पुलावर लवकरच स्लॅब

पिंपरी - हॅरिस पुलाला समांतर बांधण्यात येत असलेल्या पुलाच्या शेवटच्या गर्डरचा स्लॅब टाकण्याची तयारी महापालिकेने सुरू केली असून, महिन्याभरात ते काम पूर्ण होईल. नवीन पुलाच्या पुणे बाजूकडील पोच रस्त्याचे कामही सुरू झाले आहे.

हॅरिस पुलाला दोन्ही बाजूंना दोन समांतर पूल होत असल्याने, तसेच सीएमईसमोरील सबवेचे काम अंतिम टप्प्यात असल्यामुळे लवकरच या भागातील कोंडीची समस्या दूर होणार आहे. पिंपरीकडून पुण्याकडे येणाऱ्या समांतर पुलावरून गेल्या वर्षी वाहतूक सुरू झाली. पुलाच्या मार्गावरील बोपोडीतील झोपड्यांचे स्थलांतर झाल्यानंतर तेथील पोच रस्त्याचे आणि पुलाचे काम महापालिकेने हाती घेतले.

महापालिकेचे कार्यकारी अभियंता प्रदीप ओंबासे म्हणाले, ‘‘नदीवरील पुलाचे काम आधीच पूर्ण झाले असून, नदीकाठच्या रस्त्यावरून जाणाऱ्या शेवटच्या गर्डरचे काम हाती घेतले आहे. क्राँक्रीट स्लॅब टाकण्यात येईल. पुणे व पिंपरी-चिंचवड पालिकांनी संयुक्तरीत्या हा प्रकल्प मे २०१६ मध्ये हाती घेतला. प्रकल्पाचा खर्च २२ कोटी ४६ लाख रुपये आहे. हॅरिस पुलाला समांतर असलेला पूल मार्चच्या अखेरीला वाहतुकीसाठी खुला होईल. त्यामुळे पुण्याकडून पिंपरीच्या दिशेने येण्यासाठी चार लेन उपलब्ध होतील. पोच रस्त्याचे काम फेब्रुवारी अखेरीला पूर्ण होईल. पुलाचे संरक्षक कठडे, पदपथ, विद्युतविषयक कामे मार्चमध्ये पूर्ण करण्यात येतील.’’

आकडेवारी 
प्रकल्पाचा खर्च २२.४६ कोटी रुपये
पुलाची लांबी २०२ मीटर
पुण्याकडील पोच रस्त्याची लांबी १४५ मीटर
पिंपरीकडील पोच रस्त्याची लांबी ६५ मीटर