नियोजनाअभावी वाहतूक कोंडीचा विळखा

किरकटवाडी : रस्त्याचे काम सुरू असल्याने सिंहगड रस्त्याला लागलेले वाहतूक कोंडीचे ग्रहण अद्यापही सुटले नसल्याचे दिसून येत आहे. रविवारच्या सुटीमुळे आलेल्या पर्यटकांमुळे नांदेड फाट्यावर मोठी वाहतूक कोंडी निर्माण झाली होती. असे असताना जिल्हाधिकाऱ्यांच्या आदेशाची अंमलबजावणी करण्याबाबत पुणे शहर पोलिस विभाग व ग्रामीणच्या हवेली ठाण्याच्या पोलिसांमध्ये ‘तू-तू मैं-मैं’ सुरू असल्याचे दिसून येत आहे.

सिंहगड रस्त्याचे किरकटवाडी फाटा व नांदेड फाट्यादरम्यान काम सुरू असल्याने सकाळ-सायंकाळ वाहतूक कोंडी होत असल्याने जिल्हाधिकारी डॉ. राजेश देशमुख यांनी १८ नोव्हेंबरला सिंहगड रस्त्यावरील वाहतूक वळविण्याचे आदेश काढले. या आदेशानुसार पुण्याकडून खडकवासला, सिंहगड, पानशेतकडे जाणाऱ्या पर्यटक व नागरिकांसाठी नांदेड सिटी गेट-नांदेड गाव-शिवणे-उत्तमनगर खडकवासला असा मार्ग ठरवण्यात आलेला आहे. त्यासाठी नांदेड सिटी गेटसमोर खडकवासल्याकडे जाणारा रस्ता बंद करण्यात आलेला आहे; मात्र त्या ठिकाणी पुरेसा पोलिस बंदोबस्त न ठेवण्यात आल्याने पर्यटक व स्थानिक नागरिकांनी सरळ वाहने घातली. परिणामी नांदेड फाट्यावर वाहतूक कोंडी होऊन वाहनांच्या लांबच लांब रांगा लागल्या होत्या. याबाबत हवेली पोलिस ठाण्याचे पोलिस निरीक्षक सदाशिव शेलार यांनी शहर वाहतूक विभागाकडे, तर शहर वाहतूक पोलिस उपायुक्त राहुल श्रीरामे यांनी हवेली पोलिसांकडे बोट दाखवले आहे.

नांदेड सिटी गेटजवळ शहर वाहतूक विभागाने बंदोबस्त वाढविणे गरजेचे आहे. ग्रामीण हद्दीत योग्य बंदोबस्त आहे व वाहतूक खडकवासला धरणापासून वळविली आहे.

- सदाशिव शेलार,

पोलिस निरीक्षक, हवेली पोलिस ठाणे

दोन वाहतूक पोलिस नांदेड सिटी गेटसमोर तैनात करण्यात आलेले आहेत. नागरिक त्यांच्याशी वाद घालतात. हवेलीच्या पोलिस निरीक्षकांनी तेथे त्यांच्याकडील पोलिस तैनात करणे आवश्यक आहे. सर्व काम ग्रामीण हद्दीतच सुरू आहे.

- राहुल श्रीरामे, उपायुक्त, पुणे शहर वाहतूक विभाग

पर्यटकांमुळे स्थानिकांचे हाल होत आहेत. शनिवार-रविवार अतिरिक्त बंदोबस्त ठेवणे आवश्यक आहे.

- रूपेश घुले, नागरिक, नांदेड

तुमचे अनुभव सांगा...

सिंहगड रस्त्यावर होणाऱ्या वाहतूक कोंडीबाबत तुमचे अनुभव आम्हाला व्हॉट्सअॅप क्रमांकावर नावासह पाठवा...

८४८४९७३६०२