सोमेश्वर सोसायटीचे अध्यक्ष, उपाध्यक्ष बिनविरोध

सोमेश्वरनगर, ता. २४ : येथील श्री सोमेश्वर कामगार सहकारी सोसायटीच्या अध्यक्षपदी जयकुमार विलास भोसले यांची तर उपाध्यक्षपदी राहुल जयराम सोरटे यांची बिनविरोध निवड करण्यात आली.
राहुल खलाटे व हनुमंत भापकर यांनी अनुक्रमे अध्यक्ष, उपाध्यक्षपदाचा राजीनामा दिल्याने रिक्त जागी निवडप्रक्रिया पार पडली. उपमुख्यमंत्री अजित पवार व माजी कामगार संचालक बाळासाहेब गायकवाड यांना श्रद्धांजली अर्पण करून प्रक्रियेस सुरुवात झाली. महाराष्ट्र राज्य साखर कामगार प्रतिनिधी मंडळाचे अध्यक्ष तात्यासाहेब काळे आणि बारामती तालुका साखर कामगार सभेचे अध्यक्ष राजेंद्र तावरे, माजी कामगार संचालक बाळासाहेब काकडे यांच्या उपस्थितीत निवडी बिनविरोध झाल्या. नूतन अध्यक्ष व उपाध्यक्षांनी, संस्थेचा कारभार अधिकाधिक पारदर्शक आणि डिजिटल करू, अशी ग्वाही दिली. याप्रसंगी कामगार युनियनचे अध्यक्ष धनंजय खोमणे, तानाजीराव सोरटे, संतोष भोसले, प्रमोद खलाटे, राहुल खलाटे, हनुमंत भापकर उपस्थित होते. सचिव महेश भोसले यांनी आभार मानले.