उगवण क्षमता तपासूनच सोयाबीन पेरणी करा : नरवडे

आळेफाटा, ता. २३ : ‘‘शेतकऱ्यांनी सोयाबीन बियाण्याची उगवण क्षमता घरच्या घरी तपासूनच पेरणी करावी,’’ असे आवाहन कृषी अधिकारी राजश्री नरवडे यांनी केले.
वडगाव आनंद (ता. जुन्नर) येथे आयोजित चर्चासत्रात नरवडे बोलत होत्या. यावेळी त्यांनी सांगितले की, खरीप हंगामाच्या पार्श्वभूमीवर शेतकऱ्यांनी स्वतःकडील बियाण्याची चाचणी करणे गरजेचे आहे. यामुळे पेरणीसाठी लागणाऱ्या बियाण्याचे प्रमाण निश्चित करता येते. चाचणीसाठी १०० दाणे ओल्या गोणपाटावर रांगेत ठेवून चार दिवस पाणी शिंपडावे. चार दिवसांनंतर अंकुरलेल्या बियांची संख्या मोजावी. जर ही संख्या ७० पेक्षा जास्त असेल, तर प्रति हेक्टरी ७५ किलो बियाणे वापरावे.
पेरणीपूर्वी बियाण्यास प्रतिकिलो तीन ग्रॅम थायरम किंवा ५ ग्रॅम ट्रायकोडर्माची प्रक्रिया करावी. त्यानंतर रायझोबीयम आणि स्फुरद विरघळणाऱ्या जिवाणूंची २५० ग्रॅम प्रति १० किलो याप्रमाणे बीजप्रक्रिया करून बियाणे सावलीत वाळवावे. प्रथम बुरशीनाशक व नंतर जैविक खताची प्रक्रिया हलक्या हाताने करावी, असेही नरवडे यांनी यावेळी स्पष्ट केले.