पुणे : नव वर्षाच्या पूर्व संधेला राज्य उत्पादन शुल्क विभागाची कारवाई

नारायणगाव : नव वर्षाच्या पूर्व संधेला येथील राज्य उत्पादन शुल्क विभागाने आंबेगाव व हवेली तालुक्यात धडाकेबाज कारवाई करून बनावट देशी, विदेशी दारूचा साठा, बनावट मद्य तयार करण्यासाठी आवश्यक असलेले स्पिरीट, रिकाम्या बाटल्या, बाटल्या सील करण्याचे यंत्र, टेम्पो असा ९ लाख १४ हजार ४३२ रुपये किंमतीचा मुद्देमाल जप्त केला आहे. या प्रकरणी दोन तरुणांना अटक केली असून आरोपींना जुन्नर न्यायालयाने ३ जानेवारी पर्यंत पोलीस कोठडी दिली आहे.आशी माहिती राज्य उत्पादन शुल्क विभागाचे पोलीस निरीक्षक ए. बी.पवार यांनी दिली.या प्रकरणी सागर तुकाराम कतोरे, मयूर बाळासाहेब कतोरे(दोघेही राहणार चिंबळी, ता.खेड) यांना अटक करण्यात आली आहे.(Stocks of counterfeit domestic, foreign liquor)

या बाबत पोलीस निरीक्षक पवार म्हणाले कळंब ( ता. आंबेगाव) येथे बनावट दारू घेऊन वाहन येणार असल्याची गोपनीय माहिती मिळाली होती. त्या नुसार सापळा रचून ३० डिसेंबर २०२१ रोजी कळंब येथील हॉटेल पंचमीच्या मागील बाजूस उभ्या असलेल्या टेम्पोची तपासणी केली असता बनावट देशी, विदेशी दारूच्या बाटल्या असलेले चौदा बॉक्स आढळून आले.या प्रकरणी सागर कतोरे व मयूर कतोरे यांना अटक करून टेम्पोसह मुद्देमाल जप्त केला. या प्रकरणी आरोपींकडे सखोल चौकशी केली असता काळेवाडी (ता.हवेली)येथील गोडाऊन मध्ये बनावट मद्य तयार केले जात असल्याची माहिती मिळाली. या माहितीच्या आधारे काळेवाडी येथील गोडाऊन मध्ये छापा टाकून बनावट मद्य तयार करण्यासाठी आवश्यक असलेले स्पिरीट, रिकाम्या बाटल्या, बाटल्या सील करण्याचे यंत्र, बुच आदी मुद्देमाल जप्त केला. नवीन वर्षाच्या पूर्व संधेला दोन्ही ठिकाणी कारवाई करून ९ लाख १४ हजार ४३२ रुपये किंमतीचा मुद्देमाल जप्त केला आहे.