Pune News : आसामच्या विद्यार्थ्यांचे पुणे विद्यापीठात जल्लोषात स्वागत

पुणे : सावित्रीबाई फुले पुणेविद्यापीठात ‘युवा संगम’ सांस्कृतिक आदान-प्रदान उपक्रमांतर्गत आसाममधून आलेल्या ५० विद्यार्थ्यांचे जल्लोषात स्वागत करण्यात आले. विद्यापीठाच्या मुख्य इमारतीच्या परिसरात झालेल्या ‘युवा संगम’ कार्यक्रमात या आसामी पाहुण्यांनी अस्सल मराठमोळ्या संस्कृतीची झलक अनुभवली.

पंतप्रधान नरेंद्र मोदी यांच्या कल्पनेतील ‘एक भारत श्रेष्ठ भारत’ अभियानांतर्गत यंदा ‘युवा संगम’ उपक्रमाच्या तिसऱ्या टप्प्याचे आयोजन देशभरात केले जात आहे. त्याअंतर्गत महाराष्ट्र आणि आसाम या दोन राज्यांमधील निवडक विद्यार्थ्यांसाठी सांस्कृतिक आदान-प्रदान उपक्रमांतर्गत राज्यभेटींचे आयोजन केले आहे. त्यासाठी आसाममधील विद्यार्थ्यांचा संघ रविवारी पुण्यात दाखल झाला. पुणे विद्यापीठाने या उपक्रमांतर्गत आलेल्या आसामी विद्यार्थ्यांचे विद्यापीठात जल्लोषात आणि मराठमोळ्या पद्धतीने स्वागत करण्यात आले.

विद्यापीठाचे प्र-कुलगुरू डॉ. पराग काळकर यांच्या अध्यक्षतेखाली झालेल्या एका विशेष समारंभामध्ये सर्व सहभागी विद्यार्थ्यांना पुणे विद्यापीठ, महाराष्ट्र आणि मराठी संस्कृतीची ओळख करून देण्यात आली. विद्यापीठाच्या व्यवस्थापन परिषदेच्या सदस्या बागेश्री मंठाळकर, व्यवस्थापन परिषद सदस्य डॉ. संदीप पालवे, विद्यार्थी विकास मंडळाचे संचालक डॉ. अभिजित कुलकर्णी, राष्ट्रीय सेवा योजना विभागाचे संचालक डॉ. सदानंद भोसले आदी मान्यवर यावेळी उपस्थित होते.