Crime News : एकतर्फी प्रेमातून तरुणाचा आत्महत्येचा प्रयत्न

पुणे : एकतर्फी प्रेमातून तरुणाने स्वत:वर चाकूने वार करुन आत्महत्येचा प्रयत्न केल्याची घटना कर्वेनगर परिसरात घडली. प्रसाद चंद्रकांत दांगट (वय ३४, रा. वडगाव बुद्रूक) असे तरुणाचे नाव आहे. याबाबत एका तरुणीने फिर्याद दिली आहे. त्यावरून वारजे पोलिसांनी त्याच्याविरुद्ध तरुणीला धमकी आणि आत्महत्येचा प्रयत्न केल्याप्रकरणी गुन्हा दाखल केला आहे.

पोलिसांनी दिलेल्या माहितीनुसार, प्रसाद दांगट हा एका कर्वेनगर येथील ३२ वर्षीय तरुणीवर एकतर्फी प्रेम करत होता. परंतु तरुणीने त्याला प्रेमास नकार दिला होता. तरीही तो या तरुणीचा पाठलाग करुन तिला त्रास देत होता. गेल्या २४ मार्चपासून हा प्रकार सुरू होता.

त्याने आठ एप्रिल रोजी कर्वेनगर ते औंधदरम्यान तरुणीला गाठले. ‘तू दुसऱ्यासोबत लग्न कशी करते, ते बघतोच’ अशी धमकी त्याने तरुणीला दिली. त्यानंतर तरुणाने चाकूने स्वत:च्या पोटावर वार करून आत्महत्या करण्याचा प्रयत्न केला. या घटनेमुळे घाबरलेल्या तरुणीने वारजे पोलिस ठाण्यात तक्रार दिली.