लावणीसम्राज्ञीला शुभेच्छांची ‘साठी’

शिक्रापूर - महाराष्ट्राच्या लावणीसम्राज्ञी ज्येष्ठ पार्श्‍वगायिका सुलोचना चव्हाण यांनी आज (ता. १३) वयाच्या ८७ व्या वर्षात पदार्पण केले. अर्थात, त्यांना वाढदिवसाच्या शुभेच्छा देण्याच्या सलग साठ वर्षांची परंपरा आजही पाळली ती रेडिओ - सिलोनने. चव्हाण यांनी मराठीसह हिंदी, गुजराती, भोजपुरी, तमीळ, पंजाबी आदी भाषांमध्ये गायिलेली गीते रेडिओ सिलोनवर आज पुन्हा प्रसारित करण्यात आली.

आता बातम्या ऐकण्यासाठी डाऊनलोड करा ई-सकाळचे ऍप 

कुठल्याही शास्त्रीय संगीताचे संस्कार नसलेल्या व केवळ श्रवण आणि अनुकरण या दोहोंच्या ताकदीवर विकसित गायकीने सी. रामचंद्र, मोहम्मद रफी, मन्ना-डे, शमशाद बेगम, गीता दत्त आदींसारख्या दिग्गज गायक-गायिकांच्या काळात सुलोचना चव्हाण यांनी स्वत:ला सिद्ध केले. पुढील काळात संगीतकार वसंत देसाई, तसेच तत्कालीन संगीतकारांनी दिलेल्या सर्व लावण्या ज्या खुबीने त्यांनी गायिल्या आणि महाराष्ट्रात गाजल्या त्यामुळे त्यांच्यावर लावणी गायिका असा ठसाच उमटला. 

सामाजिक बांधीलकीला कायम केंद्रस्थानी ठेवण्याच्या त्यांच्या स्वभावाने त्यांनी अनेक शाळा, महाविद्यालये, संकटग्रस्त आदींसाठी मदतीसाठी अनेक कार्यक्रम केले. त्यातीलच एक सर्वांत हृद्य आठवण म्हणजे १९६१ मध्ये पुण्यात पानशेत धरण फुटले आणि त्या वेळीच्या संकटग्रस्तांसाठी त्यांनी आयोजित केलेल्या गीतांच्या कार्यक्रमातून आवश्‍यक ती मदत अपुरी पडल्याने त्यांनी स्वत:चे दागिने विकून मदत पूर्ण केली.

सामाजिक बांधीलकी जपणाऱ्या सुलोचना चव्हाण यांना चित्रपट, संगीत, साहित्य तसेच सामाजिक-राजकीय क्षेत्रातील अनेकांकडून शुभेच्छांचा वर्षाव सुरू झाला. रेडिओ सिलोनने आजही आपली ६० वर्षांची वाढदिवस शुभेच्छा देण्याची परंपरा पाळल्याचे कौतुक आई सुलोचनामाईला असल्याने आम्ही सर्व कुटुंबीयांना आनंद झाला. सर्व श्रोत्यांचे मनापासून आभार.
- विजय चव्हाण, ढोलकीवादक