Sambhaji Chhatrapati : राज्यातील पक्षांसमोर नवं आव्हान ; स्वराज्य संघटनेचा सर्व निवडणुका लढवण्याचा ठराव मंजूर!

माजी खासदार संभाजीराजे छत्रपती यांनी पुण्यात स्वराज्य भवनाचं लोकार्पण केले. यावेळी त्यांनी आगामी निवडणुकीत ताकतीने उतरणार असल्याचे स्पष्ट केले. यावेळी प्रस्थापित राजकारण्यांवर त्यांनी टीका केली.

राजकारणी आपला खेळ खेळायला चालले. तेच नेते तीच चर्चा, यापेक्षा वेगळं काही नाही. हा आपला महाराष्ट्र आहे. वेळप्रसंगी छत्रपती शिवाजी महाराजांचं नाव घ्यायचं, आणि खेळखंडोबा करायचा, त्यामुळे आता आपल्याला स्वराज्याच्या माध्यमातून जनजागृती करायची आहे, असे संभाजीराजे म्हणाले.

स्वराज्य संघटना राज्याच्या राजकारणात उतरणार आहे. संघटनेचे पहिले अधिवेशन आज पुण्यात पार पडलं. या अधिवेशनात राज्यातल्या सर्व निवडणुका स्वराज्य संघटना लढणार आहे, तसा ठराव आज मंजूर करण्यात आला आहे.

महाराष्ट्रातील राजकीय पक्षांना आता एक मोठ आव्हान असणार आहे. बिआरएस देखील महाराष्ट्रात पाय रोवण्याचा प्रयत्न करत आहे. आता स्वराज्य संघटना देखील निवडणुकांच्या आखाड्यात उतरणार आहे. संभाजीराजे म्हणाले, राज्यातील माजलेले राजकारणी आहेत. त्यामुळे हे चित्र आता बदलायला पाहिजे.