Swargate Rape Case : आरोपीचा डीएनए चाचणी अहवाल आल्यानंतर आरोपपत्र होणार दाखल; पोलिस आयुक्त अमितेश कुमार यांची माहिती

पुणे - स्वारगेट एसटी बसस्थानकात तरुणीवरील लैंगिक अत्याचार प्रकरणातील आरोपीच्या डीएनए चाचणीचा अहवाल लवकरच प्राप्त होइल. न्यायवैद्यक पुरावे एकत्रित करण्यात येत असून, साधारण १५ दिवसांत न्यायालयात आरोपपत्र दाखल करण्यात येईल, अशी माहिती पोलिस आयुक्त अमितेश कुमार यांनी दिली.

स्वारगेट एसटी बसस्थानकात शिवशाही बसमध्ये मंगळवारी (ता. २५) पहाटे तरुणीवर लैंगिक अत्याचार केल्याची घटना घडली होती. याबाबत दत्तात्रेय रामदास गाडे (वय ३१, रा. गुनाट, ता. शिरूर) याच्यावर गुन्हा स्वारगेट पोलिस ठाण्यात गुन्हा दाखल करण्यात आला होता.

पोलिस आयुक्त अमितेश कुमार यांनी या गुन्ह्याचा तपास बुधवारी (ता. ४) गुन्हे शाखेकडे सोपविला. या प्रकरणाचा तपास गुन्हे शाखेचे अतिरिक्त पोलिस आयुक्त शैलेश बलकवडे, पोलिस उपायुक्त निखिल पिंगळे यांच्या मार्गदर्शनाखाली सुरू करण्यात आला आहे.

या प्रकरणात तरुणीसह तिचे कुटुंबीय आणि मित्राचा जबाब नोंदविण्यात आला आहे. ही तरुणी स्वारगेट परिसरात ज्या वाहनाने आली त्या कॅबचालक आणि संबंधित शिवशाही बसच्या वाहकाचाही जबाब घेण्यात आला आहे.

घटनास्थळावरील सीसीटीव्ही चित्रीकरण, ससून रुग्णालयाकडून प्राप्त वैद्यकीय चाचणी अहवाल, बसच्या न्यायवैद्यक तपासणीचा अहवाल अशा पुराव्यांचा आरोपपत्रात समावेश असेल. या गुन्ह्याच्या तपासात कोणत्याही त्रुटी राहणार नाहीत. तरुणीला न्याय मिळवून देण्यासाठी सुटसुटीत आणि न्यायवैद्यक पुराव्यानिशी आरोपपत्र दाखल करण्यात येणार आहे, असे गुन्हे शाखेकडून स्पष्ट करण्यात आले.

आरोपीचा मोबाईल सापडेना

आरोपी दत्तात्रेय गाडेचा मोबाईल अद्याप जप्त करण्यात आलेला नाही. त्याचा मोबाईल गुनाट (ता.शिरूर) गावात शेतात हरविल्याची शक्यता आहे. त्याच्या मोबाइलमधून आणखी काही धक्कादायक बाबी समोर येतील. त्यामुळे पोलिसांकडून आरोपीच्या मोबाईलचा शोध घेण्यात येत आहे.