Pune Crime News : टांझानियातील तरुणाकडून सव्वासहा लाखांचे कोकेन जप्त

पुणे : कोंढवा भागात कोकेन विक्री करणाऱ्या टांझानियातील तरुणासह दोघांना अमली पदार्थ विरोधी पथकाने अटक केली. त्यांच्या ताब्यातून सहा लाख २५ हजारांचे ३६ ग्रॅम ९२० मिलीग्रॅम कोकेन आणि मोबाईल असा सुमारे सात लाख ५८ हजार रुपयांचा मुद्देमाल जप्त केला आहे.

बेका हमीस फाऊमी (वय ४६, सध्या रा. धर्माशी सिग्नेचर सोसायटी, साईबाबानगर, कोंढवा खुर्द, मूळ रा. टांझानिया), अर्शद अहमद इक्बाल खान (वय ४२, रा. धर्माशी सिग्नेचर सोसायटी, साईबाबानगर, कोंढवा खुर्द) अशी अटक केलेल्यांची नावे आहेत. फाऊमी याच्यावर यापूर्वी कोंढवा पोलिस ठाण्यात कोकेन आणि एमडी अमली पदार्थ तस्करीच्या प्रकरणात गुन्हा दाखल आहे.

तो येरवडा कारागृहातून नुकताच जामिनावर मुक्त झाला आहे.अमली पदार्थ विरोधी पथकाचे वरिष्ठ पोलिस निरीक्षक विनायक गायकवाड, सहायक निरीक्षक लक्ष्मण ढेंगळे, शैलजा जानकर यांच्यासह अन्य कर्मचाऱ्यांनी ही कारवाई केली.