"कोरोनाच्या दुसऱ्या लाटेत रुग्णालयात दाखल होणाऱ्यांचं सरासरी वय ४९ वर्षे"

पुणे : देशात आलेल्या कोरोनाच्या दुसऱ्या लाटेत रुग्णालयात दाखल होणाऱ्या रुग्णांचं सरासरी वय हे ४९ वर्षे असल्याचं नीती आयोगाचे सदस्य व्ही. के. पॉल यांनी म्हटलं आहे. भारतीय वैद्यक संशोधन संस्थेच्या (आयसीएमआर) दुसऱ्या लाटेबाबत आलेल्या एका अहवालावर भाष्य करताना ते बोलत होते.

आयसीएमआरनं सप्टेंबर-ऑक्टोबर २०२० आणि आत्ताच्या मार्च-एप्रिल महिन्यातील रूग्णांच्या संख्येचा तुलनात्मक अभ्यास केला. या अभ्यासात कोरोनाच्या दुसऱ्या लाटेत रूग्णालयात दाखल होणाऱ्या रूग्णांचं वय हे पहिल्या लाटेच्या तुलनेत सरासरी ५०.४ वरून कमी होत ४८.९ वर आलं आहे. याला पॉल यांनी पुष्टी दिली.

कोरोनाच्या पहिल्या लाटेच्या तुलनेत दुसऱ्या लाटेतील रुग्णांना श्वसनासंबंधीचा त्रास अधिक जाणवत आहे. पर्यायाने दुसऱ्या लाटेतील रुग्णांना ऑक्सिजनची अधिक गरज भासत आहे, अशी माहिती आयसीएमआरच्या एका अहवालातून पुढे आली आहे.

केंद्र सरकार आयात करणार ५० हजार मेट्रिक टन ऑक्सिजन

ऑक्सिजनची देशातील मागणी आता सर्वोच्च पातळीवर आहे. दिवसाला तब्बल ४ हजार ३०० मेट्रीक टन ऑक्सिजनची सध्या गरज आहे. कोविडच्या आधी ही गरज फक्त ८५० मेट्रीक टन एवढी होती. ऑक्सिजनची देशातील वाढती गरज लक्षात घेता केंद्र सरकारच्यावतीनं ५० हजार मेट्रीक टन ऑक्सिजनची आयात करण्यात येणार आहे. महाराष्ट्रासह १२ राज्यांमध्ये ऑक्सिजनची गरज जास्त असून, तेथे १७ हजार मेट्रीक टन अधिक पुरवठा करण्यात येणार आहे. व्हेंटिलेटरपेक्षा ऑक्सिजनची गरज असलेल्या रुग्णांची संख्या सध्या सर्वाधिक असल्याचं निरीक्षण आयसीएमआरनं आपल्या अहवालात नोंदवलं आहे.

ICMR च्या अहवालाचे निष्कर्ष

1. ऑक्सिजनची गरज असलेले रूग्ण - २७.८ टक्के (पहिली लाट), ५४.५ टक्के (दुसरी लाट)

2. व्हेंटिलेटरची गरज असलेले रूग्ण - ३७.३ टक्के (पहिली लाट), २७.८ टक्के (दुसरी लाट)

3. ४० वर्षावरील रूग्णालयात दाखल रूग्ण - ७२.२ टक्के (पहिली लाट), ६९.८ टक्के (दुसरी लाट)

4. ० ते १९ वयोगटातील रूग्ण (एकूण रूग्णसंख्येपैकी) - ४.२ टक्के (पहिली लाट), ५.८ टक्के (दुसरी लाट)

5. २० ते ४० वयोगटातील रूग्ण (एकूण रूग्णसंख्येपैकी) - २३.७ टक्के (पहिली लाट), २५.५ टक्के (दुसरी लाट)