पुणे : कारागृहातून जामीनावर सुटलेल्या गुन्हेगाराची निघाली रॅली

पुणे : खुनाचा प्रयत्न केल्यामुळे कारागृहात रवानगी झालेल्या व जामीनावर सुटलेल्या गुन्हेगाराची कर्वेनगर परिसरामध्ये रॅली काढून दहशत पसरविली. याप्रकरणी वारजे माळवाडी पोलिसांनी एकास अटक करून 14 जणांविरुद्ध गुन्हा दाखल केला.

वैभव उर्फ पप्या उकरे , तुषार जावळकर, सूरज पवार, मयूर पवार, आकाश धोत्रे, मनोज दिघे, अमित नलावडे, विजू मोरे, योगेश पवार, स्वप्नील धोत्रे, सागर धोत्रे, अजय धोत्रे, आशिष माळी, रोहित राठोड अशी गुन्हा दाखल झालेल्यांची नावे आहेत. याप्रकरणी पोलिस शिपाई विष्णू म्हातारमारे यांनी फिर्याद दिली आहे. पोलिसांनी दिलेल्या माहितीनुसार, वैभव उकरे विरुद्ध एकाचा खुन करण्याचा प्रयत्न केल्याप्रकरणी वारजे माळवाडी पोलिस ठाण्यात गुन्हा दाखल झाला होता. पोलिसांनी त्यास अटक करून न्यायालयात नेले. त्यावेळी न्यायालयाने त्याची कारागृहात रवानगी केली होती. दरम्यान, आरोपीला जामीन मंजुर झाल्यामुळे तो शुक्रवारी कारागृहाबाहेर पडला.

त्यानंतर तो कर्वेनगरमधील वडार वस्ती परिसरात आला. त्याच्या साथीदारांनी नागरीकांमध्ये दहशत पसरविण्यासाठी दुचाकी रॅली काढली. त्यावेळी त्यांच्याकडे तलवारी, गज, काठ्या होत्या. यासंदर्भात पोलिसांना माहिती मिळाल्यानंतर पोलिस घटनास्थळी दाखल झाले. पोलिसांनी उकरे व त्याच्या साथीदारांना समज देण्याचा प्रयत्न केला. तेव्हा त्यांनी पोलिसांना शिवीगाळ, धक्काबुक्की केली. तसेच पोलिसांना या प्रकरणात न पडण्यास सांगितले. त्यामुळे पोलिसांनी सरकारी कामात अडथळा आणणे, दहशत पसरविल्याप्रकरणी गुन्हा दाखल केला. या प्रकरणाचा तपास पोलिस उपनिरीक्षक जे. एन. होळकर तपास करत आहेत.