जुनी सांगवी-बोपोडी पूल पावसाळ्यानंतरच सुरू होणार

पुणे, ता. ६ : जुनी सांगवी ते बोपोडीला जोडणाऱ्या नवीन पुलाचे काम पूर्ण होऊन हा पूल सुरू होण्यासाठी आता पावसाळा उजाडणार आहे. मागील अडीच वर्षांपासून पुलाचे काम सुरू असून, अद्यापही काम पूर्ण झालेले नाही. त्यामुळे पावसाळा संपल्यानंतर तरी हा पूल लोकांच्या सेवेसाठी सुरू होणार का? असा प्रश्‍न आता उपस्थित होऊ लागला आहे.
पुणे व पिंपरी-चिंचवड या दोन्ही शहरांतील लोकसंख्या व प्रवाशांची संख्या वाढत असल्याने सध्या उपलब्ध असणाऱ्या पुलांवरही ताण येऊ लागला आहे. विशेषतः पावसाळ्यात नागरिकांची मोठ्या प्रमाणात गैरसोय होते. त्यामुळे पुणे व पिंपरी-चिंचवड महापालिकेकडून जुन्या सांगवीतील ममतानगर, दत्त आश्रम ते बोपोडीतील औंध रस्त्याला (जयकर पथ) जोडणारा पूल २०२२ मध्ये उभारण्यास सुरुवात झाली. पिंपरी-चिंचवड महापालिका संबंधित पुलाचे काम करत आहे. मार्च २०२३ पर्यंत या पुलाचे काम पूर्ण होणे अपेक्षित होते. मात्र, वेळेत काम पूर्ण न झाल्याने कामाला मुदतवाढ घेण्यात आली होती.

ही कामे शिल्लक
डिसेंबर २०२३पर्यंत या पुलाचे काम पूर्ण होण्याची अपेक्षा होती. आता पुलाचे काम पूर्ण झाले आहे. मात्र, त्या भोवतीचे जोड रस्ते, पुलाची लोड टेस्टिंग यांसारखी कामे शिल्लक आहेत. सांगवीतील ममता नगर येथील १८ मीटर रस्त्याच्या रुंदीकरणाचे काम अद्याप बाकी आहे. बोपोडीकडील बॉटनीकल गार्डनच्या बाजूला चौक विकसित करण्याचे काम व्हायचे आहे. त्यानंतर पुलाची लोड टेस्टिंग पूर्ण होईल. या सर्व कामांसाठी आणखी तीन महिन्यांचा कालावधी लागेल. त्यानंतर हा पूल सर्वसामान्य नागरिकांसाठी खुला केला जाणार आहे.

असा सुटेल वाहतूक कोंडीचा प्रश्‍न
सध्या हिंजवडी, वाकड, पिंपळे गुरव, सांगवी येथून येणाऱ्या वाहनचालकांना पुणे स्टेशन, येरवडा, लष्कर परिसरात जाण्यासाठी सावित्रीबाई फुले पुणे विद्यापीठ, औंध रस्ता, सांगवीमार्गे पुढे जावे लागते. हा पूल पूर्ण झाल्यास संबंधित वाहनचालकांना पडणारा मोठा वळसा वाचणार आहे.

पुलाचे काम पूर्ण झाले आहे. सांगवीकडील बाजूचे रस्ता रुंदीकरण व बोपोडीकडील बाजूचे चौकाचे काम होणे बाकी आहे. तसेच, पुलाच्या लोड टेस्टिंगचे काम व्हायचे आहे. या कामासाठी आणखी दोन ते तीन महिने लागतील. पावसाळ्यानंतर पूल खुला होऊ शकतो.
-प्रमोद ओंबासे, कार्यकारी अभियंता, पिंपरी-चिंचवड महापालिका.