महापालिकेत कोरोनावर चर्चा नाहीच;  विरोधकांच्या मागणीकडे दुर्लक्ष

पुणे - कोरोना आणि त्यावरील उपाययोजनांवरील चर्चा करा, या विरोधी पक्षाने केलेल्या मागणीकडे दुर्लक्ष करीत सत्ताधारी भाजपने मंगळवारी सलग तिसऱ्या दिवशीही सर्वसाधारण सभा तहबूक केली. पुढील महिन्याच्या पहिल्या आठवड्यात यावर चर्चा करू, असे आश्‍वासन यावेळी महापौर मुरलीधर मोहोळ यांनी दिले. 

कोरोनाचे रुग्ण शहरात सापडू लागल्यानंतर मार्च, एप्रिल आणि मे या तीन महिन्यात सर्वसाधारण सभा होऊ शकली नाही. जून महिन्यात सर्वसाधारण सभा पार पाडण्याची तांत्रिकता फक्त सत्ताधाऱ्यांकडून पूर्ण करण्यात आली. तेव्हा विरोधी पक्षाच्या नगरसेवकांनी कोरोनाची सध्यस्थिती आणि उपाययोजनांची माहिती, खर्चाचा तपशील द्यावा अशी मागणी केली होती. परंतु, कोरोनाच्या पार्श्‍वभूमीवर सभागृहात सदस्य मोठ्या संख्येने उपस्थित असल्याने सभागृह फार काळ चालविणे सयुक्तिक ठरणार नाही, असे कारण देत सत्ताधारी भाजपने सभाच तहकूब केली होती. 

पुण्याच्या बातम्या वाचण्यासाठी येथे क्लिक करा

दरम्यान गेल्या आठवड्यात ऑनलाइन सर्वसाधारण सभा घेण्यात आली. त्यावेळीही नगरसेवकांनी कोरोनाच्या विषयावर चर्चा करण्याची मागणी केली. परंतु त्याकडेही दुर्लक्ष करीत सभा तहकूब करण्यात आली. त्यामुळे आज झालेल्या सर्वसाधारण सभेत कोरोना आणि त्यावर उपाययोजना आदी विषयांवर चर्चा करण्याची मागणी पुन्हा नगरसेवकांनी लावून धरली. तेव्हा महापौर मोहोळ यांनी तुमच्या मागणीविषयी सभेचे कामकाज संपल्यानंतर त्वरित प्रशासनाबरोबर बैठक लावण्यात येईल असे सांगितले. तरी नगरसेवकांनी आग्रह धरल्यानंतर महापौर मोहोळ यांनी पुढील महिन्याच्या पहिल्या आठवड्यात होणाऱ्या सर्वसाधारण सभेत सर्व नगरसेवकांना या विषयावर बोलण्याची संधी दिली जाईल, असे सांगत सभा उरकती घेतली. 

ताज्या बातम्यांसाठी डाऊनलोड करा ई-सकाळचे ऍप