शहरातील सोसायट्यांत घरफोड्यांचे सत्र 

पुणे - शिवाजीनगर, कात्रज व हिंगणे परिसरातील सोसायट्यांमधील बंद सदनिकांचे कुलूप तोडून चोरट्यांनी लाखो रुपयांचा ऐवज चोरून नेला. याप्रकरणी शिवाजीनगर, भारती विद्यापीठ व सिंहगड पोलिस ठाण्यात गुन्हा दाखल करण्यात आला. तिन्ही घटनांमध्ये साडे चार लाख रुपयांचा ऐवज चोरट्यांनी चोरीला गेला. 

पुण्याच्या बातम्या वाचण्यासाठी येथे ► क्लिक करा

शिवाजीनगर येथील घरफोडी प्रकरणी आर्यवर्त सोसायटीमध्ये राहणाऱ्या सागर दुर्लभजी परमार (वय 75) यांनी शिवाजीनगर पोलिस ठाण्यात फिर्याद दिली आहे. बुधवारी दुपारी ते काही कामानिमित्त सदनिका बंद करून बाहेर गेले होते. दरम्यान, चोरट्यांनी त्यांच्या सदनिकेचा कडी-कोयंडा उचकटून आतमध्ये प्रवेश केला. त्यानंतर कपाटात ठेवलेले दागिने व रोकड असा तीन लाख रुपयांचा ऐवज चोरून नेला. फिर्यादी दुसऱ्या दिवशी घरी आले,त्यावेळी त्यांच्या सदनिकेमध्ये चोरी झाल्याचे त्यांच्या निदर्शनास आले. शिवाजीनगर पोलिसांनी सीसीटीव्ही चित्रीकरणाद्वारे आरोपींचा माग काढण्यास सुरुवात केली आहे. या प्रकरणाचा तपास सहायक पोलिस निरीक्षक रामदास मुंढे करीत आहेत. 

ताज्या बातम्यांसाठी डाऊनलोड करा ई-सकाळचे ऍप 

भारती विद्यापीठ पोलिस ठाण्याच्या एकाच सोसायटीतील दोन सदनिका चोरट्यांनी फोडल्या. याप्रकरणी दत्तात्रय कदम (वय 49) यांनी फिर्याद दिली. तक्रार दिली आहे. फिर्यादी हे बुधवारी सकाळी अकरा वाजता त्यांची सदनिका बंद करून बाहेरगावी गेले होते. त्यानंतर मध्यरात्रीच्या सुमारास चोरट्यांनी घराच्या दरवाजाचे कुलूप तोडून कपाटातील 75 हजार रुपयांचा ऐवज चोरून नेला. तर त्यांच्या इमारतीमधीलच आणखी एक सदनिका चोरट्यांनी फोडली. 

पिंपरी-चिंचवडच्या बातम्या वाचण्यासाठी येथे ► क्लिक करा

हिंगणे-खुर्द परिसरातील आनंदविहार कॉलनीमध्ये चोरट्यांनी भरदिवसा बाल्कनीद्वारे घरात प्रवेश करून 60 हजार रुपयांचा ऐवज चोरून नेला.याप्रकरणी करमवीर शर्मा (वय 42 ) यांनी सिंहगड पोलिस ठाण्यात फिर्याद दिली. फिर्यादी यांचे आई-वडील हे लक्ष्मी रस्त्यावर असलेल्या त्यांच्या एका नातेवाइकाच्या दुकानात त्यांना भेटण्यासाठी गेले होते. त्यावेळी चोरट्यांनी बाल्कनीतील उघड्या राहिलेल्या स्लायडिंगमधून आतमध्ये प्रवेश केला. त्यानंतर घराच्या कपाटातील दागिने व रोकड असा 60 हजारांचा ऐवज चोरून नेला.