राज्यपालांची शाबासकी हाच आशीर्वाद, सरपंच मोनिका रंगनाथ पढेर

खडकवासला : राज्यपाल सिंहगडावर आल्यावर भेट घेऊन त्यांना गावाच्या विकासासाठी निवेदन देण्याची संधी मिळाली. त्यांनी आस्थेने चौकशी करून माझ्या पाठीवर शाबासकीचा हात ठेवला, हाच माझ्यासाठी आशीर्वाद आहे. आनंदाचा क्षण आहे, अशी भावना घेरा सिंहगडच्या सरपंच मोनिका रंगनाथ पढेर यांनी ‘सकाळ’शी बोलताना व्यक्त केली.

आपली राज्यपालांशी भेट होईल का, हे माहिती नव्हते. आमदार भीमराव तापकीर यांनी मला पुढे बोलवून घेतले. घेरा सिंहगडची सरपंच म्हणून राज्यपालांना निवेदन देण्याची संधी मिळाली. अर्ध्या-पाऊण मिनिटाच्या वेळेत त्यांनी मला, ‘सरपंच आहेस का, किती शिक्षण झाले,’ असे विचारले. ‘होय, सरपंच आहे’, मी बी.कॉम. शिक्षण घेतल्याचे सांगितल्यावर त्यांनी माझे कौतुक केले.

पाठीवर शाबासकीचा आणि कौतुकाचा हात ठेवून गावासाठी चांगले काम करण्याचा आशीर्वाद दिला, असे पढेर यांनी सांगितले. सरपंच पढेर म्हणाल्या, ग्रामपंचायत घेरा सिंहगड आदिवासी क्षेत्र म्हणून घोषित करावे. स्मशानभूमी, विजेचे ट्रान्सफॉर्मर, विविध वस्त्यांवर वीजपुरवठा करणे, गाव मंदिराकडे जाणारे रस्ते करणे, पांदण रस्ते करणे, पाणीपुरवठा योजना राबवणे, गाव व वनविभागाच्या जागेची मोजणी करून मिळणे, अशा विविध मागण्या त्यांनी यानिमित्ताने राज्यपालांकडे केल्या.

सिंहगडावरील ऐतिहासिक घटना, त्यांचे संदर्भ, नरवीर तानाजी मालुसरे, छत्रपती राजाराम महाराज यांची माहिती अभ्यासक डॉ. नंदकिशोर मते यांनी दिली. सिंहगड व परिसरातील वन्यजीव, स्थानिक जैवविविधता तसेच वन संवर्धनाची माहिती उपवनसंरक्षक राहुल पाटील यांनी दिली. उपविभागीय अधिकारी सचिन बारवकर, विवेक पाटील, प्रशांत शिर्के, फुलचंद फड उपस्थित होते.