पुणे : तीन बोगस डॉक्टरांना विमाननगर येथे अटक

पुणे : वैद्यकीय प्रमाणपत्र नसतानाही विमाननगर येथे दवाखाना टाकून तेथे नागरिकांच्या जिवाशी खेळून केशरोपण शस्त्रक्रिया करणाऱ्या तीन बोगस डॉक्टरांना अटक करण्यात आली. पुणे पोलिसांची गुन्हे शाखा, महापालिका आरोग्य विभाग आणि अन्न व औषध प्रशासनाने संयुक्तपणे ही कारवाई केली. शाहरुख हैदर शहा, पंचशीला काशिनाथ रोडगे व चैताली भरत म्हस्के (सर्व रा. वडगाव शेरी), अशी अटक केलेल्या आरोपींची नावे आहेत.

विमाननगर परिसरात लुंकड क्लाइमैक्स या इमारतीमध्ये प्रमाणपत्र नसताना ‘डॉ. हेअर मैजिका’ नावाचा दवाखाना चालविण्यात येत असून त्या ठिकाणी केशरोपण शस्त्रक्रिया केली जात असल्याची माहिती पोलिस नागेशसिंग कुंवर यांना मिळाली होती. त्यानुसार महापालिका बोगस डॉक्टर कारवाई समिती आणि अन्न व औषध प्रशासन विभागाला माहिती देण्यात आली. त्यानंतर वैद्यकीय विभागीय अधिकारी डॉ. रेखा गलांडे यांच्या मार्गदर्शनाखाली युनिट चारचे पथक आणि अन्न व औषध प्रशासनाच्या पथकाने या ठिकाणी छापा टाकला. त्यावेळी नागरिकांवर केशरोपन शस्त्रक्रिया केली जात असल्याचे उघड झाले.