लहान मुलांची भांडणं सोडवणं तरुणाला पडलं महागात; तिघांनी केले कोयत्याने वार

पुणे : किरकोळ कारणावरून लहान मुलांमध्ये झालेली भांडणे सोडविण्यासाठी मध्यस्थी केल्याच्या रागातून तिघांनी तरुणावर कोयत्याने वार केले. या हल्ल्यात तरुण गंभीर जखमी झाला असून त्याच्यावर उपचार सुरू आहेत. ही घटना बुधवारी (ता.७) रात्री साडेनऊ वाजता औंधमधील कस्तुरबा वसाहतीमध्ये घडली. 

ऋषभ ऊर्फ गुड्डया सुनील गायकवाड (वय 19), आमीर अल्लाउद्दीन शेख (वय 23), अक्षय अर्जुन अडागळे (वय 23), संकेत ऊर्फ अभिषेक अरुण आवळे (वय 19) अशी गुन्हा दाखल झालेल्यांची नावे आहेत. याप्रकरणी दुर्गा गायकवाड (वय 39) यांनी चतुःश्रृंगी पोलिस ठाण्यात फिर्याद दिली आहे. आकाश नागनाथ गायकवाड (वय 24, रा. इंदिरा वसाहत, औंध) हा तरुण गंभीर जखमी झाला आहे.

- आधी मराठा आरक्षणावरील स्थगिती उठवा, मगच MPSCची परीक्षा घ्या; संभाजी ब्रिगेडची मागणी​ 

पोलिसांनी दिलेल्या माहितीनुसार, आकाश हा त्याच्या कुटुंबीयांसह औंधमधील इंदिरा वसाहतीमध्ये राहायला आहे. चार ऑक्‍टोबर रोजी त्यांच्या परिसरात राहणाऱ्या लहान मुलांची किरकोळ कारणावरून भांडणे सुरू होती. आकाशने त्यामध्ये मध्यस्थी करून मुलांची भांडणे सोडविली होती. त्याचा राग गुड्ड्या गायकवाड याने मनात धरला. त्यातूनच त्याने बुधवारी रात्री साडे नऊ वाजता आकाशला गाठले. त्यास 'भांडणात तू मध्यस्थी करतो, खूप मोठा भाई झाला का, आता तुला संपवून टाकतो' असे म्हणत गुड्ड्या, आमीर आणि अक्षय या तिघांनी आकाशला मारहाण करीत त्याच्यावर कोयत्याने वार केले. या घटनेमध्ये आकाश गंभीर जखमी झाला. या घटनेनंतर तिघेही तेथून पळून गेले. कुटुंबीय आणि स्थानिक नागरिकांनी आकाशला उपचारांसाठी रुग्णालयात दाखल केले.

- पुण्याच्या बातम्या वाचण्यासाठी येथे ► क्लिक करा

(Edited by : Ashish N. Kadam)