अप्पर शेवटचा बसथांब येथे रस्त्यावर ट्रॅक्टरचा थरार

बिबवेवाडी - अप्पर शेवटच्या बस थांब्या समोर शनिवारी दुपारच्या वेळी रिकामा ट्रॅक्टर ट्रॉलीसह उताराच्या रस्त्याने सुसाट वेगाने नागरिकांमध्ये घुसला. त्यामध्ये दहा दुचाकी व एका टपरीचे नुकसान करत स्नेहलता सुर्यवंशी यांच्यासह दोन नागरिक जखमी झाले.

अप्पर शेवटचा बस थांब्याचा रस्ता तीव्र उताराचा असून स्थानिक नागरिक आनंद साळुंखे यांनी दिलेल्या माहितीनुसार शनिवारी दुपारी पावणेतीनच्या सुमारास ट्रॅक्टर चालक उताराच्या रस्त्यावर ट्रॅकटर लावून नाश्ता करण्यासाठी गेला होता, ट्रॅकटर उताराच्या रस्त्यावर निसटून विना ड्रायव्हर वेगात रस्त्यावर धावत होता, कोणालाही काही कल्पना नव्हती सुदैवाने ट्रॅकटर रस्त्यावर डाव्या बाजूला दुचाकी पार्किंग केलेल्या ठिकाणी घुसून दहा दुचाकींना धडक देत थांबला. यामध्ये दुचाकींचे मोठ्या प्रमाणात नुकसान झाले असून एका महिलेसह दोन नागरिक जखमी झाले.

तीन वर्षापूर्वी एक चारचाकी वाहन अशाच प्रकारे उताराच्या रस्त्यावर लावले होते तेही अशाच प्रकारे उताराच्या रस्त्यावर निसटून चार नागरिक जखमी झाले होते. उताराच्या रस्त्यावर तीन वर्षांपूर्वी दोन वेळा पीएमपीएल च्या बस चे ब्रेक निकामी होऊन झालेल्या अपघातात एका नागरिकाला प्राण गमवावे लागले होते तर अनेकजण जखमी झालेल्याची घटना घडली होती.