हेड तंबाखूजन्य पदार्थांवर वाढीव उत्पादनशुल्क सबहेड एक फेब्रुवारीपासून अंमलबजावणी

सकाळ न्यूज नेटवर्क
नवी दिल्ली, ता.१ ः तंबाखूजन्य पदार्थ तसेच पानमसाल्यावरील वाढीव उत्पादनशुल्क येत्या एक फेब्रुवारीपासून लागू होणार असल्याची माहिती केंद्र सरकारकडून देण्यात आली आहे. या करामध्ये वाढ करण्याच्या अनुषंगाने केंद्र सरकारने संसदेच्या गेल्या हिवाळी अधिवेशनात केंद्रीय उत्पादनशुल्क सुधारणा विधेयकाला मंजुरी दिली होती. त्यानंतर तंबाखूजन्य पदार्थांवरील उत्पादन शुल्कात वाढ करण्याचा मार्ग मोकळा झाला होता. सिगारेटच्या लांबीनुसार त्याच्यावरील उत्पादनशुल्क वाढविण्यात आले आहे. प्रति हजार स्टिकमागे २०५० ते ८५०० रुपयांपर्यंत ही वाढ करण्यात आली आहे. या शुल्कवाढीमुळे तंबाखूजन्य पदार्थ आणि पानमसाल्याचे सेवन करणाऱ्यांना या उत्पादनांसाठी जास्त पैसे मोजावे लागणार आहेत. करवाढीच्या निर्णयामुळे केंद्र सरकारच्या महसुलात वाढ होईल. तंबाखूजन्य पदार्थ आणि पानमसाल्यावर लावण्यात आलेले हे शुल्क वस्तू आणि सेवा कराच्या (जीएसटी) व्यतिरिक्त असतील. जीएसटी भरपाई कराची जागा नवीन कर घेणार आहे. जीएसटी करप्रणालीत तंबाखूजन्य पदार्थांना सर्वाधिक कराच्या श्रेणीत ठेवण्यात आले आहेत. यातील पानमसाला, तंबाखू, सिगारेट आणि अन्य संबंधित पदार्थांवर ४० टक्के तर विडीवर १८ टक्के इतका कर लावण्यात आला आहे.