बारामती महिलेचा पुर्ववैमनश्यातून खून

माळेगाव, ता. १० : कऱ्हावागज (ता. बारामती) येथे रविवारी (ता. ९) पूर्ववैमनस्यातून महिलेचा कुऱ्हाडीचे घाव घालून खून करण्यात आला. गंगूबाई तात्याराम मोरे (वय ५०) असे खून झालेल्या महिलेचे नाव आहे. याबाबत किरण दादा मोरे याच्यावर गुन्हा दाखल केला आहे.
याबाबत खून झालेल्या गंगूबाई यांची सून प्रमिला प्रमोद मोरे (वय ३०, रा. कऱ्हावागज) यांनी बारामती तालुका पोलिस ठाण्यात फिर्याद दिली की, घराच्या अंगणात शेळ्या येण्याच्या कारणावरून अडीच वर्षांपूर्वी किरण दादा मोरे यांच्या कुटुंबीयांबरोबर भांडणे झाली होती. ती भांडणे गावपातळीवरील नेतेमंडळींनी व नातेवाइकांनी मिटविली होती. त्यामुळे त्यावेळी पोलिसात तक्रार दिली नव्हती. तेव्हापासून आम्ही दोन्ही कुटुंबीय एकमेकांशी बोलत नव्हतो. असे असतानाही किरण मोरे हा आमची सासू गंगूबाई मोरे यांच्याकडे येताजाता रागाने बघत असत. रविवारी नेहमीप्रमाणे गंगूबाई या नातू सार्थक व जीवन यांना सोबत घेऊन गप्पा मारण्यासाठी कांतिलाल मोरे यांच्या पत्राशेडजवळ गेल्या होत्या. त्याच वेळी किरण हा हातात कुऱ्हाड घेऊन पत्राशेडकडे आला व त्याने आमच्या गंगूबाई यांच्या डोक्यात पाठीमागून कुऱ्हाडीने हल्ला केला. त्यामुळे त्या जमिनीवर कोसळल्या. त्यानंतर त्याने त्यांच्या छातीवर जोरदार वार केला. त्यावेळीच तेथे जमलेल्या शारदाबाई पगारे, अधिकाबाई मोरे, माणिक सोनवणे यांनी त्याला बाजूला करण्याचा प्रयत्न केला. परंतु, तो कुऱ्हाड व पायातील चप्पल जागीच सोडून माळरानाच्या दिशेने पळून गेला.
दरम्यान, पोलिसांनी आरोपी किरण मोरे याच्याविरुद्ध गुन्हा दाखल केला असून, त्याला अटक केली आहे. याबाबत सहायक पोलिस निरिक्षक महेश विधाते हे पुढील तपास करीत आहेत.