भारनियमनावर तोडगा काढावा ः मयुरसिंह पाटील

बावडा, ता. १४ ः इंदापूर तालुक्यातील अनियमित भारनियमनामुळे शेतकरी त्रस्त आहेत. यावर शासनाने तोडगा काढावा अन्यथा शेतकरी विविध मार्गाने शासनाला जाब विचारतील, असा इशारा इंदापूर तालुका कृषी उत्पन्न बाजार समितीचे माजी सभापती मयुरसिंह पाटील यांनी दिला.
पत्रकारांशी बोलताना पाटील म्हणाले, राज्य शासनाच्या महावितरण कंपनीकडून भारनियमनाचे संकेत आलेले आहेत. सध्या आठ तासांचे भारनियमन होणार असे ऊर्जामंत्री सांगत आहेत. हे राज्य सरकारचे अपयश आहे. दहा तास वीज नसेल तर छोटे व्यावसायीक कसे टिकणार, हा प्रश्नच आहे. उन्हाळ्यामुळे पिण्याच्या पाण्याचा प्रश्‍न ग्रामीण भागामध्ये गंभीर बनत निघाला आहे. तसेच पाणी असूनही विजेअभावी शेतीला पाणी देता येणार नाही. त्यामुळे पिके वाया जाणार आहेत. त्यामुळे याप्रश्नी तातडीने उपाययोजना व्हायला हवी.