वेल्ह्यात २० जणांना कोरोनाची बाधा

वेल्हे, ता. १३ : आमदार संग्राम यांच्या संपर्कात आलेल्या वेल्हे तालुक्यात सभापती दिनकर सरपाले व गटविकास अधिकारी विशाल शिंदे यांच्यासह महसूल मधील कर्मचाऱ्यास कोरोनाची बाधा झाली असल्याने प्रशासनाकडून चिंता व्यक्त केली जात आहे.
लोकप्रतिनिधी अधिकारी व कर्मचारी असे मिळून वेल्हे तालुक्यात कोरोना बाधितांची संख्या वीसवर पोचली असल्याची माहिती तालुका वैद्यकीय अधिकारी डॉ. अंबादास देवकर यांनी दिली.

याबाबत देवकर म्हणाले, वेल्हे तालुक्यात आतापर्यंत वीस जणांना कोरोनाची लागण झाली आहे. सध्या कोरोनाची लक्षणे सौम्य असून चार पाच दिवसात बरा होत आहे. त्यामुळे नागरिकांनी घाबरून न जाता त्रास होत असल्यास ताबडतोब जवळच्या शासकीय दवाखान्यात उपचारासाठी जावे तसेच एखाद्याला गंभीर लक्षणे असल्यास वेल्हे येथील ग्रामीण रुग्णालय येथे उपचारासाठी दाखल व्हावे.
तालुक्यातील तहसील कार्यालय, पंचायत समिती येथील प्रशासकीय अधिकारी व व काही पदाधिकारी शासकीय कर्मचारी यांना देखील लागण झालेली आहे. सर्दी ताप किंवा त्यापेक्षा वेगळी लक्षणे असल्यास ताबडतोब शासकीय रुग्णालयात तपासणीसाठी जावे असे आवाहन यावेळी करण्यात आले आहे.
नागरिकांनी मास्क, सॅनिटायझर, सामाजिक अंतर या त्रिसूत्रीचा वापर करावा व वारंवार हात धुवावेत गरज असल्यासच घराबाहेर पडावे, गर्दी टाळावी असे आवाहन तहसीलदार शिवाजी शिंदे यांनी केले.
तालुक्यातील पर्यटन स्थळे किल्ले तोरणा राजगडावर बंदी असून जमावबंदीचे उल्लंघन, विना मास्क आढळून आल्यास कायदेशीर कारवाई करण्यात येईल असा इशारा सहायक पोलिस निरीक्षक मनोज पवार यांनी केले आहे.