नीरा नरसिंहपुरात आवक घटल्याने भाजीपाल्याचे भाव तेजीत

नीरा नरसिंहपूर, ता. ११ : मकर संक्रांतीच्या सणानिमित्त सुगड, हळदी कुंकू, बांगड्या, तीळ आदी वस्तू येथील आठवडे बाजारात विक्रीसाठी आल्या होत्या. मात्र, कोरोनाच्या वाढत्या प्रादुर्भावाचा परिणाम बाजारात दिसून येत आहे. कारखान्यांकडून उसाचे बिल मिळाल्याने बाजारात काही प्रमाणात खरेदीचा उत्साह कमी दिसून आला. तर आवक घटल्याने भाजीपाल्याचे भाव तेजीत आहेत.
मकर संक्रातीनिमित्त लागणारे ओवशाचे साहित्य व इतर वस्तू चढ्या भावाने ग्राहकांना खरेदी कराव्या लागल्या. यात खण (पाच सुगडांचा सेट) ८० ते १०० रुपये, कुंकू १५० ते २०० रुपये किलो, हळद १८० ते २०० रुपये किलो, सुपारी ७०० ते १००० रुपये किलो, खारीक १०० ते १५० रुपये किलो, विड्याची पाने ५० ते ८० रुपये शेकडा, बांगड्या १०० ते १५० रुपये असे भाव आहेत.
संक्रांतीच्या आदल्या दिवशी म्हणजे भोगीला करण्यात येणारे खेंगाट व भाकरीसाठी लागणारी बाजरी २५ ते ३० रुपये किलो, तीळ १० ते १५ रुपये पन्नास ग्रॅम, बोरे ३० ते ५० रुपये किलो, चाकवत २५ रुपये जोडी, गाजर ३० ते ५० रुपये किलो, घेवडा ६० ते ८० रुपये किलो, चुका २५ रुपयाला जोडी, पालक १० रुपये असा बाजारात भाव होता. विविध प्रकारच्या भाज्यांची आवक घटल्याने भाव तेजीत आहेत.