आळंदीत निराधारांना ब्लॅंकेटचे वाटप

आळंदी, ता. १५ : येथील संस्कृती फाउंडेशनच्यावतीने इंद्रायणी तीरावरील निराधारांना २०० ब्लॅंकेटचे वाटप करण्यात आले. गेल्या दहा वर्षांपासून तीर्थक्षेत्र आळंदीसह पंढरपूर, देहू, जेजुरी, भीमाशंकर व सासवड या ठिकाणी हे वाटप करण्यात येते, असे फाउंडेशनचे संस्थापक अध्यक्ष बापू चिंचकर यांनी सांगितले.
इंद्रायणी घाटासह आळंदीतील मठ, मंदिर, धर्मशाळा, चाकण चौक, प्रदक्षिणा मार्ग, भैरोबा चौक, मरकळ रोड, बस स्थानक, पोलिस ठाणे परिसर, मरकळ रोड नगर परिषद चौक आदी ठिकाणी थंडीमध्ये कुडकुडत असणाऱ्या निराधारांना ब्लॅंकेट दिले. यावेळी ज्ञानेश्‍वर बनसोडे, अजय मुंडे, संस्कार बोडके, अनिकेत चावरे, ज्ञानेश्‍वर चिंचकर, सुधाकर शेटे, ओंकार चिंचकर, शंकर बोडके, ज्ञानेश्‍वर चिंचकर, सुधाकर शेटे, ओंकार चिंचकर, शंकर बोडके, राजेंद्र बनसोडे आदी उपस्थित होते.