डिंगोऱ्यातील शाळेत मोहीम सुरु

ओतूर, ता. ८ ः डिंगोरे (ता. जुन्नर) येथील ग्राम विकास मंडळ ओतूर संचलित पुष्पावती विद्यालयात इयत्ता नववी आणि दहावीमध्ये शिक्षण घेत असलेल्या १५ ते १८ या वयोगटातील विद्यार्थ्यांना कोव्हॅक्सिनचा पहिला डोस देऊन लसीकरण मोहिमेला सुरुवात करण्यात आली, अशी माहिती विद्यालयाचे मुख्याध्यापक शिवाजी अस्वार यांनी दिली.
पुणे जिल्हा परिषदेच्या आरोग्य विभागामार्फत ओतूर प्राथमिक आरोग्य केंद्राचे वैद्यकीय अधिकारी डॉ. श्रीहरी सारोक्ते आणि डॉ. यादव शेखरे यांच्या मार्गदर्शनाखाली विद्यालयातील इयत्ता नववी आणि दहावीच्या एकूण १२० विद्यार्थ्यांना कोविड प्रतिबंधक लसीकरणाचा पहिला डोस देण्यात आला.
या लसीकरण मोहिमेची सुरूवात जिल्हा परिषदेचे सदस्य अंकुश आमले यांच्या हस्ते करण्यात आली. या प्रसंगी डिंगोरेच्या सरपंच सीमा सोनवणे, माजी जिल्हा परिषद सदस्य बबन तांबे, उपसरपंच नीलेश लोहोटे, मुक्तादेवी मंडळ मुंबईचे वसंत लोहोटे, लक्ष्मण लोहोटे, स्थानिक स्कूल कमिटीचे अध्यक्ष चंद्रकांत लोहोटे, शिक्षक पालक संघाचे वैभव पाडेकर आदी उपस्थित होते.
लसीकरण मोहीम यशस्वी करण्यासाठी ओतूर प्राथमिक आरोग्य केंद्राचे कर्मचारी व सर्व शिक्षक शिक्षकेतर कर्मचारी यांनी प्रयत्न केले.