कोंढापुरीत ‘डिजिटल मार्केटिंग’ विषयावर ऑनलाईन कार्यशाळा

तळेगाव ढमढेरे, ता. २४ : कोंढापुरी (ता. शिरूर ) येथील आर. एम. धारीवाल सिंहगड मॅनेजमेंट स्कूलमध्ये ‘डिजिटल मार्केटिंग’ या विषयावर ऑनलाईन कार्यशाळेचे आयोजन करण्यात आले होते. कॉर्पोरेट डिजिटल मार्केटिंगचे रोहित देव यांनी कार्यशाळेत प्रमुख पाहुणे म्हणून मार्गदर्शन केले.
‘‘उत्पादक कंपन्यांनी ग्राहकांपर्यंत पोहोचले पाहिजे. तुम्ही मोठ्या कंपन्यांशी स्पर्धा करू शकता. तुमच्या ग्राहकांवर लक्ष्य केंद्रित करून त्याप्रमाणे मोहिमेची आखणी केल्यास गुंतवणूकीवर उत्तम परतावा मिळेल, असे देव यांनी सांगितले. तसेच, वर्ड प्रेस प्लॅटफॉर्मवर वेबसाईट डिझाईन करण्याबाबत, उत्पादनाची मीडियावर जाहिरात करण्याबाबत त्यांनी माहिती दिली. गूगलच्या माध्यमातून प्रॉडक्ट सेल रिपोर्ट तयार करता येतो. गुगल टूल्सच्या माध्यमातून ऑनलाईन परीक्षेचे आयोजन करता येते. विविध कोर्सेस चालविता येतात. विद्यार्थी नोकरी शोधू शकतात.’’ ‘डिजिटल मार्केटिंग क्षेत्रातील ग्राहकांची अपेक्षा’ अशा अनेक विषयांवर त्यांनी कार्यशाळेत मार्गदर्शन केले. यावेळी संचालक अनिता माने, प्रा. झेड. एस. मुल्ला, आणि एम. बी. ए. चे प्राध्यापक, विद्यार्थी व औद्योगिक क्षेत्रातील मान्यवर उपस्थित होते.