कासारी गावात तीव्र पाणीटंचाई

तळेगाव ढमढेरे, ता. २९ : कासारी (ता. शिरूर) गावात उन्हाळ्याच्या तोंडावरच तीव्र पाणीटंचाई निर्माण झाली असून, येथील शासकीय इनामाच्या तळ्यात त्वरित चासकमानच्या पाण्याचे आवर्तन सोडण्याची मागणी ग्रामपंचायतीतर्फे सरपंच सुनीता भुजबळ यांनी शिक्रापूर येथील चासकमान पाटबंधारे विभागाच्या शाखा अधिकाऱ्यांकडे निवेदनाद्वारे केली आहे.
दरम्यान, कासारी गावात सध्या तीव्र पाणी टंचाई जाणवत असून, ग्रामस्थांचा व जनावरांचा पिण्याच्या पाण्याचा गंभीर प्रश्न निर्माण झाला असल्याचे सरपंच भुजबळ यांनी सांगितले.
येथील शासकीय इनामाच्या तलावाशेजारी विहीर असून या विहिरीतून ग्रामपंचायतीची नळ पाणीपुरवठा योजना आहे. परंतु, सध्या हा तलाव कोरडा ठणठणीत पडल्याने विहिरीची पाणीपातळी खोलवर गेल्याने नळ पाणीपुरवठा योजना बंद आहे. येथील शासकीय तलावात त्वरित चासकमानच्या पाण्याचे आवर्तन सोडून ऐन उन्हाळ्यातील पाणी टंचाई दूर करावी, अशी मागणी ग्रामस्थांतर्फे सरपंच भुजबळ यांनी केली आहे.