दौंड तालुक्यात कोरोनाचा ५७ रुग्ण

दौंड, ता. ८ : दौंड तालुक्यात कोराना विषाणूच्या प्रादुर्भावाने बाधित सक्रिय रुग्णांची संख्या ५७ झाली आहे. शहरातील खासगी रूग्णालयात उपचार घेणाऱ्या बाधितांविषयी नगरपालिकेकडे नोंद नसल्याचे स्पष्ट झाले आहे.
दौंड तालुक्यातील केडगाव व वरवंड येथे प्रत्येकी ६, गोपाळवाडीत ५, यवतला ४, कुरकुंभ येथे ३, आदी गावांमध्ये एकूण ५५ सक्रिय रूग्ण असल्याची माहिती तालुका आरोग्य अधिकारी डॅा. सुरेखा पोळ यांनी दिली. दौंड उप जिल्हा रूग्णालयात २ रूग्ण उपचार घेत असल्याची माहिती वैद्यकीय अधीक्षक डॅा. संग्राम डांगे यांनी दिली. दौंड शहरातील खासगी रुग्णालयांमध्ये कोरोना बाधितांवर उपचार सुरू आहेत, परंतु त्याची शासन दरबारी नोंद नसल्याचा गंभीर प्रकार पुन्हा समोर आला आहे. नगरपालिका हद्दीतील फक्त एका रुग्णालयाकडून बाधितांची माहिती नगरपालिकेला कळविण्यात आली आहे, अशी माहिती नगरपालिकेचे आरोग्य निरीक्षक शाहू पाटील यांनी दिली.