वीज बिलाच्या वसुलीला उसाच्या बिलातून विरोध

इंदापूर, ता. ३१ : शेतकऱ्यांच्या ऊस बिलातून थकीत वीज बिल वसुली करण्याच्या राज्य सरकारच्या निर्णयास आमचा तीव्र विरोध असून, या पद्धतीने वीज बिल वसुली शेतकऱ्यांवर अन्यायकारक व बेकायदेशीर आहे. त्यामुळे कुठल्याही परिस्थितीत शेतकऱ्यांच्या ऊस बिलामधून थकीत वीज बिलाची वसुली होऊ देणार नाही, असा इशारा भाजप नेते व माजी सहकारमंत्री हर्षवर्धन पाटील यांनी दिला.
याबाबत ते म्हणाले की, महाराष्ट्र हे कल्याणकारी राज्य असल्याने महाविकास आघाडी सरकारने शेतकऱ्यांच्या हिताचे निर्णय घेणे आवश्यक आहे. कोल्हापूर जिल्ह्यातील शेतकऱ्यांच्या ऊस बिलातून केलेली थकीत वीज बिलाची वसुली चुकीची आहे. त्यामुळे थकीत वीज बिलाची शेतकऱ्याकडून सक्तीने वसुली करण्यास आमचा तीव्र विरोध आहे. वास्तविक शेतकऱ्यांना विजेची बिले अव्वाच्या सव्वा आली आहेत. ती चुकीची बिले दुरुस्त करून देणे गरजेचे आहे. शेतकऱ्यांनी नेहमीच वापरलेल्या विजेची बिले भरलेली आहेत. जर शासनाने शेतकऱ्यांच्या ऊस बिलातून थकीत वीजबिल वसुलीचा तगादा लावला, तर राज्यामध्ये भाजपतर्फे आंदोलन केले जाईल.