भोर एसटी आगारातून दररोज ३८० फेऱ्या रद्द

भोर, ता. १ : राज्य परिवहन महामंडळाच्या येथील आगारातून एसटीच्या दररोज ४४० फेऱ्या होत असत. परंतु, संपामुळे फक्त ४५ कर्मचारी कामावर असल्यामुळे केवळ ६० फेऱ्या पूर्ण होतात. त्यामुळे एसटीची अवस्था बंद असल्यासारखीच आहे.
भोर आगारातील कार्यरत असलेल्या १०७ चालकांपैकी ९६ चालक, ७४ वाहकांपैकी ५८ वाहक, ३३ यांत्रिकी कर्मचाऱ्यांपैकी ३० आणि १६ प्रशासकीय कर्मचाऱ्यांपैकी १, असे एकूण १८५ कर्मचारी संपावर आहेत. त्यामधील ३३ चालक, २४ वाहक, १० यांत्रिकी कर्मचारी आणि १ प्रशासकीय कर्मचारी, यांचे निलंबन केले आहे. निलंबनाची सुनावणी सुरू असूनही संबंधित कर्मचारी सुनावणीस हजर राहात नाहीत.
भोर आगारातील २३० कर्मचाऱ्यांपैकी १८५ कर्मचारी अद्यापही संपावर आहेत. त्यामुळे एसटीच्या दररोज ३८० फेऱ्या रद्द कराव्या लागत आहेत. संपावर असलेल्या ६८ कर्मचाऱ्यांना निलंबित केले आहे. अद्यापही कर्मचारी संपावर असल्यामुळे एसटी आगाराचे नुकसान होत आहेच. तसेच, ग्रामीण भागातील प्रवाशांना पुरेशी सेवा मिळत नाही. भोरमधून केवळ पुणे, टिटेघर, शिरवळ, महुडे, चिखलगाव व म्हसर या ठिकाणी एसटीची सेवा सुरु आहे. मुंबई, औरंगाबाद, सोलापूर, कोल्हापूर व पंढरपूर या ठिकाणासाठीच्या एसटी अद्यापही सुरु केलेल्या नाहीत.