पडवी येथे घरफोडीत दागिन्यांची चोरी

वरवंड, ता. १ : पडवी (ता. दौंड) येथे लोकवस्तीत भरदिवसा चोरट्यांनी घरफोडी करून २४ तोळे सोन्याच्या दागिन्यांची चोरी केली. पडवी येथील बोरवनवस्तीमध्ये रामभाऊ विठोबा शितोळे यांचे राहते घर आहे. घराच्या आजूबाजूलाही इतर लोकवस्ती आहे. शितोळे हे शनिवारी दुपारी बारा वाजता घराच्या दरवाजाला कुलूप लावून कुटुंबासमवेत बाहेरगावी गेले. दुपारी तीन वाजता ते घरी परतले. त्यावेळी त्यांना घराचा सेफ्टी व मुख्य दरवाजा उघडा दिसला. तसेच, कुलूप तुटलेल्या अवस्थेत होते. त्यांनी घाईघाईने घरात प्रवेश करून पाहणी केली. त्यावेळी घरातील कपाटातील साहित्य इतरत्र पडल्याचे त्यांच्या निदर्शनास आले. तसेच, सोन्याचे दागिनेही गायब झाल्याचे लक्षात आले. त्यांनी पोलिसांना माहिती दिली. सुमारे चोवीस तोळे सोन्याच्या दागिन्यांची चोरी झाल्याचे प्रथमदर्शी दिसून आले.