बारामतीत कचरा गाडीला हॉर्न त्रासदायक

बारामती, ता. १ : येथील नगरपरिषदेच्या जवळपास सर्वच कचरा गाड्या सध्या शहरात कचरा गोळा करताना सायरनचा आवाज असणारा हॉर्न वाजवला जातो. तो कर्कश असून, लोकांना त्याचा त्रास होत आहे. त्यामुळे हा सायरन बंद करावा, अशी मागणी महाराष्ट्र नवनिर्माण सेनेच्या वतीने केली आहे. भार्गव पाटसकर, नीलेश वाबळे, पोपटराव सूर्यवंशी, अमोल गालिंदे, प्रवीण धनराळे, स्वप्नील मोरे यांनी मुख्याधिकारी महेश रोकडे यांच्याकडे निवेदनाद्वारे ही मागणी केली आहे. या सायरनमुळे रुग्णवाहिका, पोलिस गाडी किंवा अग्निशामन दलाचे वाहन आहे का? असा गैरसमज लोकांच्या मनात निर्माण होत आहे. शहरी क्षेत्रात तातडीच्या प्रसंगाव्यतिरिक्त इतर वेळेस सायरन प्रतिबंधित आहे. त्यामुळे सायरनच्या वापरावर निर्बंध आणावेत, अशी मागणी त्यांनी केली आहे. दाट लोकवस्ती आणि वाढत्या वाहनांच्या संख्येने राज्यातील शहरांमध्ये ध्वनी प्रदुषणाची पातळी वाढत आहे. वाहनांच्या भोंग्यामुळे मोठ्या प्रमाणात निर्माण होणाऱ्या ध्वनीची पातळी पर्यावरणीयदृष्ट्या संवेदनशील क्षेत्र आणि जैवविविधतेने आच्छादीत नैसर्गिक परिसरावर विपरीत आघात करीत असून मानवी आरोग्यावर देखील याचा परिणाम होत असल्याचे त्यांनी निवेदनात नमूद केले आहे.