विद्या प्रतिष्ठान विद्यालयामध्ये दोन नवीन तांत्रिक विषय सुरु

बारामती, ता. ५ : विद्या प्रतिष्ठान मराठी माध्यमिक विद्यालयाने शैक्षणिक वर्ष २०२०-२१ पासून नववी व दहावीच्या विद्यार्थ्यांसाठी इलेक्ट्रॉनिक्स टेक्नॉलॉजी आणि २०२१-२२ या शैक्षणिक वर्षात इलेक्ट्रिकल टेक्नॉलॉजी हे विषय सुरू केले असल्याची मुख्याध्यापक रामचंद्र शिंदे यांनी दिली.

महाराष्ट्र शासन कौशल्य विकास व उद्योजकता विभागाच्या शासन निर्णयानुसार या विषयांचा अभ्यासक्रम सुरु करण्यात आला आहे. इलेक्ट्रिकल टेक्नॉलॉजी या विषयास शासन मान्यता मिळाली आहे . दोन्ही विषयांसाठी लागणाऱ्या प्रात्यक्षिक लॅब विद्यालयात तयार करण्यात आल्या आहेत. ग्रामीण भागातील विद्यार्थ्यांना कौशल्यावर आधारित शिक्षण मिळावे व रोजगाराची संधी उपलब्ध व्हावी, या उद्देशाने हे विषय सुरु केले आहेत.

दहावीनंतर डिप्लोमा, बायफोकल, आयटीआय या कोर्सला प्रवेशासाठी राखीव जागा, स्वतःचा व्यवसाय सुरु करणे, असे अनेक फायदे टेक्निकल विषयांच्या शिक्षणामुळे विद्यार्थ्यांना भविष्यात होणार आहेत. संस्थेचे उपाध्यक्ष ॲड. अशोक प्रभुणे, सचिव ॲड. नीलिमा गुजर, खजिनदार युगेंद्र पवार, विश्वस्त सुनेत्रा पवार, डॉ. राजीव शहा, किरण गुजर, मंदार सिकची, रजिस्ट्रार श्रीश कंभोज यांनी मार्गदर्शन केले. इलेक्ट्रॉनिक्स विषयाच्या प्रमुख प्रिती बोबडे व इलेक्ट्रिकल विषयाचे प्रमुख विजय वाबळे यांनी यासाठी परिश्रम घेतले.